Galaxy J6 ва Galaxy A6 (2018) арзон баҳода сотувга чиқарилади
Айтиш жоизки, Samsung компаниясининг Galaxy Note 8 ҳамда Galaxy S9 каби флагман смартфонлари "Infinity Display" дизайнига эга бўлгани боис жуда тез оммалашмоқда ва кўпчиликнинг ижобий муносабатига сазовор бўлган. Энди навбат худди шундай дисплейли, фақат техник жиҳатдан бир оз пастроқ, шу билан бирга нархи ҳам арзон смартфонларга келган кўринади.
Samsung бир неча дақиқалар олдин Galaxy J туркумига мансуб 2 та, шунингдек Galaxy A6 ҳамда Galaxy A6+ номли янги смартфон моделларини Ҳиндистонда ҳам тақдим қилди. Барча янги смартфонлар "Infinity Display" дизайнидаги олд панелга эга бўлган ва кўринишидан жуда ҳашамдор.
Янги минг йилликнинг нозиктаъб харидорлари учун ишлаб чиқилган Galaxy "J" туркумининг мазкур мобил алоқа воситалари экран ҳошияларидан маҳрум бўлгани эвазига, уларда тасвирни томоша қилиш янада қулай. Бироқ, пикселлар сиғими флагманларники каби эмас, аниқроғи 1280 х 720 пикселли. A6+ модели эса FHD+ экран билан таъминланган. Шу билан бирга, смартфонлар нисбатан ҳамёнбоп нархларда сотувга чиқарилади.
Янги Galaxy J6 смартфони 5.6 дюймли AMOLED Infinity display экранига эга бўлган. Смартфон фаолияти учун 8 ядроли процессор масъул. Девайсга 2/3/4 гигабайтли тезкор ҳамда 32/64 (доимий хотирани кенгайтириш учун microSD бўлмачаси мавжуд) доимий хотира картаси ўрнатилган.
Бош камерага 13 мегапикселли, олд камерага 8 мегапикселли матрицага эга объективлар ўрнатилган. Ҳар иккала камералар LED фоточақноғи билан таъминланган.
Икка SIM картали смартфонлар LTE алоқа тармоқларида ишлайди.
Куч-қувват учун электр токи сиғими 3,000 мА соат бўлган аккумулятор ўрнатилган.
Смартфонлар Android 8.0 Oreo тизимининг Samsung Experience 9.0 UX талқини бошқарувида фаолият кўрсатади.
Galaxy “J” туркумига мансуб янги смартфонлар эса 220 доллардан 290 долларгача бўлган нархда сотилади. Бир муддат аввал бу моделнинг энг арзони 290 доллардан сотилиши ҳақида хабар тарқатилган эди.
Galaxy A6 ҳамда Galaxy A6+ смартфонлари 5,6 ҳамда 6 дюймли дисплейга эга бўлган. Биринчисининг процессори 1,6 ГГц такт частотасида ишлайди, Galaxy A6+ моделида эса бу кўрсаткич 1,8 ГГц.гача оширилган. Аккумуляторларининг ток сиғими ҳам ўзгача: Galaxy A6 смартфонида у 3000 мА/соатга тенг бўлса, унинг «акаси» 3500 мА/соатлик батарея билан «қуролланган».
Galaxy A6 f/1.7 диафрагма билан таъминланган 16 мегапикселли битта бош камерага эга бўлган. Унинг олд камераси ҳам 16 мегапикселли, аммо f/1.9 диафрагмали. «Плюсли» янги смартфоннинг асосий камераси эса 16 ва 5 мегапикселли иккита объективни ўз ичига олган. Galaxy A6+’нинг олд камераси 24 мегапикселли селфилар олади.
Galaxy A6 модели 290 АҚШ долларидан бошлаб, 360 АҚШ долларигача бўлган нархда сотувга чиқарилди.
