Galaxy S20‘ни чўнтак кўтармаяптими? Samsung унинг Lite-версиясини тайёрлаяпти!
Samsung компанияси ўтган йили кутилмаганда Galaxy S10 Lite ҳамда Galaxy Note 10 Lite смартфонларини тақдим этган. Булар – тегишлича Galaxy S10 флагмани ва Galaxy Note 10 фаблетининг «енгилроқ» версияларидар.
ЎҚИНГ: Samsung смартфонлари, планшетлари ва телевизорларига чегирма, яна совғалари ҳам бор!
Samsung учун ноанъанавий бўлган мазкур тажриба ўзини оқлади – нисбатан арзон бўлган ушбу яримфлагман смартфонлар яхши сотиляпти. Шундан келиб чиқиб, компания бу йил ҳам флагманларининг «енгил» версияларини тайёрламоқда.
Ҳар ҳолда, инсайдерлар Galaxy S20 Lite ҳақида маълумот тарқатиб улгуришган. Компания ичида ушбу моделни Galaxy S20 Fan Edition номи билан юритишяпти, унинг каталог рақами эса SM-G780 ва SM-G781 (ҳудудига боғлиқ ҳолда) ҳисобланади.
Galaxy S20 Lite ҳақида батафсил маълумот йўқ, аммо унинг 128 гигабайтлик флеш-хотирага эга варианти бўлиши маълум. Samsung уни Android 10 операцион тизими асосида тайёрланган One UI 2.5 график қобиғи билан чиқариши кутилмоқда, лекин тақдимот вақти ҳам аниқ эмас.
«Енгиллаштирилган флагман»нинг қайси процессор базасига қурилиши номаълум; лекин Galaxy S10 Lite моделининг Snapdragon 855 чипсети базасида тайёрланганини ҳисобга олсак, унинг давомчисида Snapdragon 865 бўлишини кутиш мумкин. Яна ким билади, бу процессорнинг қимматлиги Galaxy S20 Lite таннархини ошириб юборишини ҳисобга олиб, Snapdragon 765G қўлланиши ҳам эҳтимолдан холи эмас. Шунда у ўрта нархли смартфонларнинг янги «қироли» сифатида бозорга кириб келади.
ЎҚИНГ: Дунёдаги энг кучли ўнта ҳамёнбоп смартфон (AnTuTu рейтинги, 2020 йил май)
