Galaxy S8 қийинчилик билан iPhone 7’ни мағлуб қилди
Халқаро интернет тармоғида Samsung Galaxy S8’нинг ишлаш самарадорлиги бўйича имтиҳон натижалари тарқалиб кетди. Macdigger нашрининг маълум қилишича, кореялик янги флагман смартфон ички тизимининг фаолият кўрсатиш кўрсаткичи бўйича ўзининг “ашаддий” рақиби бўлмиш америкалик iPhone 7’ни зўрға мағлуб қилган.
Аввал хабар берганимиздек, Samsung Galaxy S8 2 хил талқинда – Snapdragon 835 ва Exynos 8895 процессорлари билан таъминланган версияларда ишлаб чиқарилмоқда. Qualcomm компаниясининг процессорларига эга смартфон талқини Хитой ва АҚШда сотилади. Боиси бу бозорларда CDMA ва TD-SCDMA, яъни Qualcomm процессорларида ишлайдиган смартфон талаб этилади.
Ҳар иккала процессорнинг технологик ишлаш жараёни Samsung томонидан ишлаб чиқарилган ва 10 нанометрни ташкил қилади. Ҳар иккала талқиндаги Galaxy S8 эгалари бу процессорлар фаолиятидаги фарқни сезмайдилар. Яъни, уларнинг ишлаш самарадорлиги деярли бир хил.
Шундай қилиб, мобил қурилмалар салоҳиятини баҳолайдиган AnTuTu бенчмаркида Galaxy S8’нинг Exynos 8895 процессорига эга талқини 174,155 балл тўплашга эришган. Яъни, у самарадорлик бўйича рейтинг лидери бўлган iPhone 7 Plus’ни ортда қолдирган. Samsung Galaxy S8’нинг Snapdragon 835 процессорига эга талқини эса 162,101 балл тўплаган. Бу эса 173 110 балл тўплаган “Олма” смартфонидан анча пастроқ.
Galaxy S8 ва Galaxy S8+ смартфонлари анонси 29 март куни АҚШда ўтказилди. “Ниҳоясиз дисплей”ли смартфон лақабини олган мобил алоқа воситалари икки ёнга силлиқ дизайнда букилган 5,8 ва 6,2 дюймли дисплей, кўзнинг рангдор пардасини аниқлаш ва юз-қиёфани таниш технологияси, шунингдек Bixby овозли ёрдамчиси, 12 МП бош ва 8 МП олд камера ҳамда чанг ва сувни юқтирмас IP68 стандартидаги корпус билан таъминланган.
Ишлаб чиқарувчи Galaxy S8 учун 977 ҳамда Galaxy S8+ учун 1,066 АҚШ доллари сўрамоқда. МДҲ давлатларида смартфонларни апрел ойи охирларидан харид қилиш мумкин бўлади.
Galaxy S8 тўғрисида бу материалда батафсил ўқинг.
