Кох Дон Джин: Galaxy Note серияси яшашда давом этади
Куни кеча Жанубий Кореянинг Samsung компанияси 2016 йилнинг август ойида тақдим этилган ва орадан бир неча ой ўтгач жиддий носозлик туфайли ишлаб чиқарилиши тўхтатилган Galaxy Note 7 фаблетининг ёниб кетиш сабабларига аниқлик киритди.
Ferra сайтининг ёзишича, Samsung топ-менежери Кох Дон Джин CNET нашри билан ўтказилган суҳбатда Galaxy Note 7 билан содир бўлган нохушликка қарамай, Galaxy Note сериясидаги смартфонлар чиқарилишда давом этишини маълум қилган. У мазкур қарорга изоҳ берар экан, янги фаблет хавфсиз ва янада инновацион бўлиши, жаҳонда ушбу серия ихлосмандлари етарли даражада кўп эканини алоҳида қайд қилган. Бундай мижозлар компания чиқарадиган Note қурилмаларини кутишади ва бошқа моделлардан фойдаланишни исташмайди, деб айтган у.
