Наманганда уяли телефонлар учун аксессуарлар ишлаб чиқарилади
Наманган вилоятига ташриф буюрган Хитойнинг “LLT TechnoLogy Limited” hamda “Beijing Janus Greending WheeL Co.LTD” компанияси бошқаруви кенгаши аъзолари шаҳар ҳокимлигида музокаралар олиб борган. Бу ҳақда “Namnews.uz” маълум қилди.
Маълум бўлишича, хорижлик бизнесменлар иштирокида Наманган шаҳар ҳокими Шавкатжон Абдураззоқов қабулида ўтказилган учрашув давомида икки томонлама ҳамкорликни ривожлантириш масалалари юзасидан ўзаро фикр алмашган.
Бунинг пировардида, учрашувда Наманган шаҳрида янги барпо этилган “Юксалиш” кичик саноат зонасида хитойлик ҳамкорлар билан биргаликда телефон аппаратлари учун аксессуарлар ҳамда қурилиш ишларида фойдаланиш учун силлиқлаш айланаси (балгарка тош) ишлаб чиқаришни йўлга қўйиш юзасидан келишувга эришилган.
Қайд этиш жоизки, мазкур истиқболли лойиҳани амалга ошириш натижасида дастлабки босқичда 250 та, кейинги босқичда эса қўшимча яна 250 та янги иш ўринлари яратилади.
