Nokia 9 PureView фотофлагмани намойиш қилинди – беш модулли камерага эга илк смартфон!
HMD Global компанияси MWC 2019 кўргазмаси доирасида беш объективли камерага эга дунёдаги илк смартфон – Nokia 9 PureView флагманини тақдим этди. Бу – бир йилдан бери кутилаётган намойиш, аммо қурилманинг ўзи кутилганидек чиқмаган...
ЎҚИНГ: Афсонавий бренднинг энг кутилаётган флагмани Geekbench’да шарманда бўлди!
Анча кечиккан флагман
Nokia 9 PureView фотофлагмани 5.99 дюймлик P-OLED дисплейга эга. Экрани «кемтик»сиз, ромлари ҳам жуда юпқа эмас, тасвир аниқлиги эса 2880x1440 пикселга тенг. Дисплейга бармоқ изи сканери интеграция қилинган, корпуснинг олд юзаси Gorilla Glass 5 ҳимоя шишаси (буям энг сўнгги версияси эмас) билан муҳофазаланган.
Бултур HMD муҳандислари Nokia 9 устида иш бошлаганларида, Qualcomm компаниясининг энг илғор процессори Snapdragon 845 модели эди. Флагманнинг камера алгоритмлари ушбу чипга мослаштирилган эди, шу боис уни энг сўнгги ва кучли – Snapdragon 855 процессорига алмаштирмай қўяқолишган.
Nokia 9 PureView фақат битта версияда – 6 гигабайтлик тезкор ва 128 гигабайтлик доимий хотира билан чиқарилади. Яна унинг корпусида microSD картаси учун жой ҳам ажратилмаган.
«Револьвер» камера, видео ва селфи имкониятлари
Хулласи калом, узоқ кутилган флагманнинг биттагина устун жиҳати – беш модулли бош камераси бўлиб қоляпти. Лекин уям кутилганидан ўзгачароқ бўлиб чиқди: барчаси 28 миллиметрлик фокус масофасига эга. Яъни, ҳеч қанақа оптик зум ёки кенг бурчакли съёмка деган нарса йўқ. Барча модуллар 12 мегапикселлик бўлиб, f/1.82 апертурали ZEISS оптикалари билан таъминланган. Улардан фақат иккитаси рангли, қолган учтаси эса RGB-фильтрсиз монохром сенсорлардир.
Суратга олишда уларнинг барчаси бир вақтнинг ўзида ишлайди, ҳар биридан олинган тасвир яхлит суратга бирлаштирилади ва у ўта аниқ бўлиб чиқади. Google Pixel смартфонлари камераси ҳам шунга ўхшашроқ тарзда ишлайди, аммо уларда битта якка датчикнинг ўзида олинган бир нечта кадр бир расмга бирлаштирилади. Nokia 9 PureView камерасининг янгича тизимини бошқариш учун ўн олтита «кўз»ли Light L16 ижодкорлари томонидан ишлаб чиқилган Light Lux Capacitor чипи қўлланади.
ЎҚИНГ: 16 та модулли бу ғалати камера фотографиянинг келажаги
Шунингдек, Nokia 9 PureView олинган суратнинг ўзида кадрнинг 1200 даражадаги чуқурлиги ҳақидаги батафсил маълумотни сақлаб қўя олади (бошқа аксарият смартфонларда эса 7–12 даражадаги чуқурлик ҳақида маълумот сақланади). Расмларни олинганидан кейин ҳам Google Photos иловасида фокусни ўзгартириш ва орқа фонни хиралаштириш имкони бўлади. Adobe фотомуҳаррирларида қулай қайта ишлаш учун RAW DNG усулида суратга олиш мумкин, аммо бунда расм жуда секин сақланади – 10 сониягача.
Смартфонни бирламчи созлашда фойдаланувчига Lightroom иловасини юклаб олиш таклиф этилади. Суратга олишнинг қўлда созланадиган режими ҳам бор. Қурилма штативга маҳкамланганида у янгича режимга ўтади ва янада узоқроқ – 10 сониягача вақт кутиб туриб суратга ола билади.
Видеога тушириш имкониятлари борасида ҳам сюрприз йўқ – сониясига 30 кадр тезлигида 4K сифатли HDR-видео олиш имкони бор.
20 мегапикселлик олд камера фойдаланувчининг юзини таниш орқали смартфонни қулфдан чиқариш функциясига ҳам эга. Яхши ёритилмаган шароитда эса селфилар яхши чиқиши учун ундаги бир нечта пикселларни битта қилиб бирлаштира олади.
Яна нималари бор?
Nokia 9 PureView металл ромли корпусга эга бўлиб, IP67 стандартига кўра чанг ва сувдан ҳимояланган. Орқа панел ҳам тобланган Gorilla Glass 5 шишасидан ишланган, фақат кўк рангда ишлаб чиқарилади. Корпуснинг ўлчамлари 155х75х8 миллиметрни ташкил этади ва у 172 грамм тош босади.
Смартфоннинг автономлиги учун 3320 мА/соатлик аккумулятор масъул, унга тезкор ҳамда 10 ваттлик симсиз қувватлаш технологиялари жорий этилган. Икки двухдиапазонли Wi-Fi, Bluetooth 5.0, GPS ва NFC функциялари мавжуд. Замонавий USB Type-C порти бор, қулоқчин тирқиши эса йўқ.
HMD Global компанияси Android 9 Pie тизимли бу девайсини Android One дастури доирасида тақдим этган – янгиланишларни у биринчилар қаторида қабул қилади.
Nokia 9 PureView сотилиш ҳудудига қараб 600–700 евро нархида, айрим мамлакатларда март ойиданоқ савдога чиқарилади. Nokia 8 Sirocco модели каби, бу фотофлагман ҳам чекланган нусхада ишлаб чиқарилади, компания унинг миқдорини ҳам маълум қилмаган.
Дарвоқе, HMD Global ушбу тадбирда ҳамёнбоп Nokia 4.2, Nokia 3.2, Nokia 1 Plus ҳамда Nokia 210 смартфонларини ҳам намойиш этган.
