Ўзбекистон бўйича UzCard ишламай қолди – пластик карта орқали тўловлар қилиб бўлмайди!

15 сентябрь куни кечга бориб, Ўзбекистондаги катта супермаркетларда терминаллар ишламай қолгани учун, одамлар арава-арава харидларини дўконда қолдириб, чиқиб кетаётгани ҳақида хабарлар пайдо бўлганди. Маълум бўлишича, бу супермаркетлар билан боғлиқ муаммо эмас, балки UzCard фаолиятида вақтинчалик техник носозликлар юз берган экан, дея хабар беради «Дарё» нашри.

ЎҚИНГ: UzCard барча пластик карта эгаларини Telegram’даги фирибгарликдан огоҳлантирмоқда

UzCard компаниясининг расмий сайтида эълон қилинган баёнотида шундай дейилади:

«Техник носозликлар муносабати билан 15 сентябрь куни соат 18:52 дан бошлаб POS, E-POS терминаллари ва АТМ-қурилмалари процессинг маркази билан вақтинчалик улана олмаяпти».

Бу дегани — пластик картангиз орқали вақтинча ҳеч нарса сотиб ололмайсиз, дегани. Компания маъмурияти бунинг учун узр сўрагани ҳолда, тизим қачон ишлаб кетиши ҳақида бирор маълумот бермаган.

Payme ёки Click’га кириб, пластик картангиз баланси 0 бўлиб қолганини кўриб, қўрқиб кетманг — бу ҳам UzCard билан боғлиқ муаммонинг бир қисми. Payme компаниясининг маълум қилишича, «Ягона умумреспублика процессинг маркази фаолиятидаги техник носозлик муносабати билан ҳозирги вақтда фойдаланувчи кабинетида пул маблағларининг баланси вақтинча ноаниқ кўрсатилмоқда».

UzCard юзага келган вақтинчалик ноқулайликлар учун узр сўраб, компания мутахассислари тизим фаолиятини қайта тиклаш учун ҳозирда қўлидан келган барча чораларни ишга солаётганини маълум қилди. Пластик карталаримиз қачондан бошлаб яна ишлай бошлаши ҳақида ҳозирча ҳеч нарса дейилмаган.

Шунингдек, «Ўзбектелеком» акционерлик компанияси ўз Telegram-канали орқали чиқиш қилиб, UzCard тизимининг ишида юзага келган узилишга алоқаси йўқлигини, компаниянинг маълумот узатиш тармоғи одатдагидек ишлаётганини айтган.

ЎҚИНГ: «Facebook тармоғига уланишдаги муаммоларга «Ўзбектелеком"нинг алоқаси йўқ» — компания