Сеулдаги янги Apple Store Samsung штаб-квартираси яқинида очилиши мумкин

Apple компанияси Сеул шаҳрида ўзининг илк ритейл (чакана) савдо дўконини очишни режалаштирган. Sammobile нашрининг хабар беришича, Сеулда очиладиган янги Apple Store Samsung компанияси штаб-квартирасининг шундоққина яқинида жойлашиши мумкин.

Албатта, Samsung Жанубий Корея бозорида жуда катта мавқега эга. LG билан биргаликда иккала гигант мамлакат смартфон бозорининг 80%га эгалик қилади. Табиийки, бундай шароитдаги монотон бозорда Apple ҳам ўз позицияларини мустаҳкамлашни мақсад қилган. Масалан, янгидан-янги бозорларни забт этиш учун Купертино компанияси Хитойда 36 та, Гонконгда 4 та ритейл дўконларини очди.

Apple ўзининг чакана савдога мўлжалланган Apple Store дўконларига жуда катта эътибор билан ёндашади, айнан мана шу дўконлар компания қурилмаларининг сотилишида катта роль ўйнайди. Шунинг учун Жанубий Кореяда ҳам Apple Store нуқталаридан кучли фаолликни кутмаслик тўғри бўлмайди. Ҳозирда Apple ўз маҳсулотларини Жанубий Кореяда учинчи томон ритейлерлари орқали сотиб келмоқда.