Windows XP ҳалигача Microsoft’га қарашли энг оммабоп операцион тизимлардан бўлиб қолмоқда

Бундан икки ой аввал Microsoft компанияси Windows 10 дастурига бепул янгиланиш имкониятини чеклаб қўйди. Шундан кейин Net Applications компанияси Microsoft’га тегишли операцион тизимларнинг жаҳон бозоридаги улушини таҳлил қилди. Ўтган икки ой ичида Windows 10 дастурининг бозордаги улуши 22,53%га тушиб кетган. Бунга асосий сабаб мазкур дастурнинг бепул ўрнатиш имкониятининг чекланганидир.

Windows 7 версияси Microsoft операцион тизимлари орасида энг оммабоп дастур бўлиб қолмоқда. Агар мазкур версиянинг бозордаги улуши август ойида 47,27%ни ташкил қилган бўлса, бу кўрсаткич сентябрь ойига келиб 48,27%га ўсган. Ундан кейин Windows 10 дастури келмоқда. Учинчи ўринни эса Windows XP эгаллаган. У жаҳондаги 9,11% компьютерларга ўрнатилган. Бироқ шуни таъкидлаш керакки, борган сари Windows XP версиясининг бозордаги улуши камайиб боряпти. Бунинг сабаби эса маълум.

Windows 8 версияси аввалдан унча оммалашмагани туфайли рейтингда тўртинчи ўринни банд қилган. Унинг дунё бозоридаги улуши сентябрь ойида 7,83%ни ташкил қилган.