Xiaomi Mi 5S қўш камерага эга бўлади
Хитойнинг Xiaomi компанияси тез орада тақдим этиши кутилаётган Xiaomi Mi 5S смартфони кучли техник параметрларга эга бўлиши тахмин қилинмоқда. Шу кунгача тарқалган хабарларга кўра, янги флагман 5,15 дюймли 3D Touch технологиясидаги Full HD дисплей, Snapdragon 821 процессори, 4 ёки 6 ГБ тезкор хотира, ойна ости Sense ID бармоқ изи сканери, 3500 мА/ст сиғимли батарея ва MIUI 8 интерфейси билан таъминланади.
Куни кеча хитойлик гигант қўш камера акс этган тизерни ҳам намойиш этди. Тизерга кўра Xiaomi Mi 5S камераси яқинда тақдим этилган Redmi Pro услубида тайёрланади: йирикроқ асосий сенсор ва кичик аниқлик даражасидаги иккинчи камера. Аммо камералар комбинацияси янги смартфонда батамом бошқача бўлиши ҳам мумкин (мисол учун 16+8). Ҳозирча ушбу камеранинг имкониятлари борасида етарли маълумот мавжуд эмас. Барча тафсилотларга 27-сентябрь куни модель тақдимотида ойдинлик киритилади.
