Хитой регуляторида Xiaomi’нинг яна бир – Mi Mix Fold букламафони «қўлга тушди»!

Ҳозиргача бир нечта смартфонсозлар қайишқоқ экранли букламафон ишлаб чиқишган, баъзилари фақат прототипини намойиш этишган. Xiaomi ҳам бир нечта буклама телефон прототипини кўрсатган бўлса-да, ҳали бирортасини расман тақдим қилмаган.

ЎҚИНГ: «ЖОНЛИ» ВИДЕО: Xiaomi президенти Mi Mix Flex (ёки Mi Dual Flex) буклама смартфонини ишлатиб кўрсатди!

Хитой Интеллектуал мулк бошқармаси (Chinese National Intellectual Property Administration – CNIPA) маълумотлар базасида Xiaomi’нинг яна бир инновацион ишланмаси учраб қолди. Уни топиб эълон қилган 91mobiles ресурсига кўра, компания ушбу маҳсулотини Xiaomi Mi Mix Fold деб номлаяпти.

Манбанинг таъкидлашича, Xiaomi уни энг илғор Android-процессор – Snapdragon 865 билан таъминлаяпти.

ЎҚИНГ: Xiaomi яна буклама смартфонини «жонли» видеода кўрсатиб мақтанди

Xiaomi Mi Mix Fold конструкцияси ўтган йилги Huawei Mate X букламафонига жуда ўхшаш. Содда қилиб айтганда, букилганида унинг экрани ташқарида қолади.

Mi Mix Fold экранининг тирқишида қўшалоқ камера кўзга ташланади. Ундан смартфон «ёйиқ» бўлган ҳолатда ҳам, «ёпилган» ҳолатдаям фойдаланса бўлади – селфи учун бошқа камерага эҳтиёж йўқ.

Xiaomi ушбу смартфонини Android базасидаги MIUI график қобиғининг айнан букламафонларга мосланган версияси билан чиқариши аниқ. Фақат унинг намойиш санаси ҳам, бошқа техник жиҳатлари ҳам ҳозирча номаълум.

ЎҚИНГ: Кокаин можароси: Samsung ва бошқалар атиги 349 долларлик букламафондан нега қўрқяпти?