Google yetakchisi AQShda eng ko‘p to‘lanadigan rahbarga aylandi
Google yetakchisi Sundar Pichai AQShda eng ko‘p maosh to‘lanadigan rahbarga aylandi. AQShning Qimmatli qog‘ozlar va birja komissiyasi tomonidan taqdim etilgan ma’lumotga ko‘ra, u joriy yilda kompaniya aksiyalaridan tushgan 199 million AQSh dollari miqdoridagi mablag‘ga ega bo‘lgan.
2015 yilning 2 oktyabrida Google kompaniyasiga egalik qiluvchi Alphabet Inc. xoldingi tashkil etilgach, janob Pichai kompaniyaga rahbar etib tayinlangan edi.
43 yoshli Sundar Pichaiga joriy yilning 3 fevral kuni Alphabet xoldingining $199 million dollarga teng bo‘lgan 273,328 dona aksiyasi topshirilgan. Aksiyalardan tushgan navbatdagi mukofot puli bilan birga Pichay narxi taxminan $650 million dollarga teng aksiyalar egasiga aylandi. Bu mukofot pullari unga 2019 yilga qadar har chorakda, bosqichma-bosqich o‘tkazib beriladi.
Shuningdek, Forbes nashrining yozishicha, Google asoschilari Larri Peyj hamda Sergey Brin $34.6 mlrd. va $33.9 mlrd. dollar miqdoridagi mablag‘ga ega.
Sundar Pichai 1972 yilda Hindistonning Maduray shtatida, injener-elektrik xonadonida tug‘ilgan. Hindistonning Xaragpur texnologiyalar instituti (bakalavr), AQShning Stenford universiteti (magistr), shu bilan birga Pensilvaniya universitetlarida tahsil olgan. U kompaniyaga 2004 yilda kelib qo‘shilgan. Rahbarga aylanguniga qadar Google Chrome, Chrome OS, shuningdek Google Drive kabi dasturiy mahsulot va loyihalarning menejmenti bo‘yicha mas’ul lavozimlarda faoliyat ko‘rsatgan. U kompaniyaning Gmail hamda Google Maps loyihalarining rivojiga katta hissa qo‘shgan.
2015 yilda Cheniere Energy energetika kompaniyasi rahbari Sharif Souki yil davomida $141,949,28 dollar daromad olib, AQShda eng ko‘p maosh to‘langan rahbarga aylangan.
