Gresso’dan yarim million dollar turadigan iPhone 7
Shu oyning boshida namoyish etilgan iPhone 7 o‘zining avvalgi o‘tmishdoshlaridan tashqi tomondan katta farq qilmaydi. Biroq o‘z gadjetlarini boshqalarning qurilmalaridan ajralib turishini istaydiganlar uchun lyuks turkumidagi telefonlar ishlab chiqaruvchisi bo‘lgan Gresso kompaniyasi qora brilliantlar bilan bezalgan iPhone 7 modelining maxsus versiyasini taklif qilmoqda.
Gresso har biri 500 000 AQSh dollari turadigan 3 xil ekzemplyarni sotuvga qo‘ygan. Mazkur hashamli iPhone 7 modelining orqa korpusi jami og‘irligi 102 karat bo‘lgan 1450 xil qimmatbaho toshlar bilan bezalgan, korpusning o‘zi esa 5 klassdagi titandan tayyorlangan.
Gresso logotipi va kamera gardishi 18 karatli oltindan ishlangan. Bundan tashqari, smartfon o‘ramiga qora rangdagi jami vazni 2 karat bo‘lgan 30 ta qora brilliantlar bilan bezatilgan eksklyuziv Apple AirPods naushniklari ham kiritilgan.
Bunday qimmatbaho smartfon va naushniklarni tayyorlash uchun taxminan 18 soat vaqt sarflanadi. Albatta, barcha ishlar Gresso zargarlari tarafidan qo‘lda bajariladi. Zargarlar asos sifatida 256 GBli iPhone 7 modelidan foydalanadilar. Har bitta bunday iPhone 7 o‘z korpusida tegishli tartib raqamiga ega bo‘ladi.