Samsung O‘zbekistonda LED-monitorlar ishlab chiqarishni kengaytirmoqchi
Janubiy Koreyaning Samsung kompaniyasi O‘zbekistonning Artel kompaniyasi bilan hamkorlikda kelasi yili O‘zbekistonda LED-monitorlar ishlab chiqarishni kengaytirishni rejalashtirmoqda. Bu haqda kompaniya xodimi Sputnik agentligi bilan suhbat chog‘ida aytib o‘tdi, deya xabar bermoqda Kun.uz.
2015 yil avgustida Zominda ish boshlagan zavod 2 oy ichida yuqori samaradorlikda ishlab, O‘zbekiston bozorining kengligini ko‘rsatgan va qo‘shni davlatlarning qiziqishini oshirgan.
“Bu O‘zbekistondagi birinchi tajriba, shu bois hozirning o‘zidanoq mahsulotimizga bo‘lgan ehtiyojni his qilmoqdamiz. Bu talab nafaqat mahalliy dilerlar, balki xorijiy kompaniyalar tomonidan kelmoqda. Shu bois ishimiz unumdorligi o‘smoqda”, – ma’lum qildi agentlik suhbatdoshi.
Bugungi kunda korxona Samsung brendi ostida 19 va 22 dyuymli 2 modeldagi monitorlarni ishlab chiqarmoqda. 2016 yil oxiriga kelib 27 dyuymli yana bir turdagi monitor ishlab chiqarilishi yo‘lga qo‘yiladi.
