Taniqli futurolog Rey Kursveyl 2099 yilgacha kutilayotgan texnologiyalarni aytdi
Google texnik direktori, texnologik sohaning taniqli futurologi Rey Kursveyl asr so‘ngiga qadar insoniyat qanday texno-imkoniyatlarga ega bo‘lishini ma’lum qildi. U 1990-yillardan boshlab kelajak imkoniyatlarini oldindan ma’lum qilib keladi. Sun’iy aql texnologiyasi kelajakka xos muhim ilmiy-texnik kashfiyotlardan biri bo‘lishi ham aynan shu muhandis tomonidan ma’lum qilingan edi.
Shunday qilib, futurologik qarashlarga diqqat qilamiz:
2019 – Personal va mobil qurilmalar uchun ishlatilinadigan kabel va provoda simlari endi o‘tmishda qoladi. Barcha ma’lumotlar simsiz almashilinadi.
2020 – Personal kompyuterlar inson miyasi kabi tezkor ishlash ko‘nikmasiga ega bo‘ladi.
2021 – Internetga simsiz ulanish Yer sharining 85 foiz nuqtasida mavjud bo‘ladi.
2022 – AQSh va Yevropada odamlar va robotlar o‘rtasidagi munosabatlarin tartibga soluvchi qonunlar qabul qilinadi. Jumladan, ularda robotlarning haq-huquqlari, majburiyatlari, ularga qo‘yilgan cheklovlar ko‘rsatiladi.
2024 – Kompyuterdagi sun’iy intellekt elementlaridan avtomobillarda foydalaniladi. Natijada, odamlarga kompyuter yordamchilari o‘rnatilmagan avtomobilni boshqarish taqiqlanadi.
2025 – Odamlar uchun gadjet-implantatlar sotiladigan ommaviy bozorlar paydo bo‘ladi.
2026 – Ilmiy izlanishlar evaziga, endi vaqt birligida avvalgidan ko‘ra ko‘proq umr kechirishga ulguramiz.
2027 – Qiyin vazifalarni bajara oladigan personal robot uyimizdagi muzlatkich va televizor kabi odatiy buyumlar qatoriga qo‘shiladi.
2028 – Quyosh energiyasi ommalashib, bugungidan bir necha o‘n barobar arzonlashadi.
2029 – Kompyuter olamni inson kabi his qila boshlaydi va buni ular mashinalar ham mushohada qila olishini isbotlaydigan Tyuring imtihonidan o‘tib isbotlashadi. Ularning miyasi insonnikiga tenglashadi.
2030 – Ishlab chiqarishda nanotexnologiyalar ulushi oshib, barcha mahsulotlar arzonlashadi.
2031 – 3D-printerlarda odam a’zolarini chop etish va jarrohlikda ulardan foydalanish oddiy holga aylanadi.
2032 – Nanorobotlardan tibbiyot maqsadlarida foydalaniladi. Ular inson tomirlarini quyqalardan tozalab, kletkalarga ozuqa moddalarini yetkazib beradilar. Shuningdek, ular yordamida inson miyasi yuqori darajada skaner qilinadi.
2033 – Ko‘chalar o‘z-o‘zini boshqaradigan avtomobillarga to‘lib-toshadi.
2034 – Sun’iy intellektga ega ilk odam bilan muomala qilish mumkin bo‘ladi.
2035 – Fazoviy texnika taraqqiy etib, Yerni asteroidlardan himoya qiluvchi kuchli tizim yaratiladi.
2036 – Biologiya fani va dasturlash sohalari birgalikda insondagi to‘qimalarni dasturlab, kasallkilarni davolash yo‘lga qo‘yiladi.
2037 – Inson miyasi faoliyatiga oid sir-sinoatlarni o‘rganish cho‘qqisiga yetadi. Unda yuzlab yangi ong-osti hududlari kashf etilib kodlanadi va miya raqamli algoritmlar evaziga yanada kuchli funksiyalarga ega bo‘ladi. Miyadagi neyronlar kompyuter tarmoqlariga ulanadi.
2038 – Trans-gumanik texnologiyalar bilan ta’minlangan robotlashgan odamlar paydo bo‘ladi. Ular ilm-fanning tor mavzulariga mo‘ljallangan yuqori darajali sun’iy intellektga ega bo‘ladilar. Shuningdek, odamlar ko‘z yoki boshqa a’zolari yuqori darajada rivojlangan, o‘ta qiyin maxsus vazifaga layoqatli bo‘ladilar.
2039 – Nanomashinalar to‘g‘ridan-to‘g‘ri miyaga o‘rnatiladi va miya to‘qimalaridagi signallarni yozib ola boshlaydi. Bu esa kelajakda biror bir qurilmasiz ham virtual olamda yashash imkonini beradi.
2040 – Qidiruv tizimlari inson organizmiga joylashtiriladi. Endi ovozsiz, miya orqali buyruq berib ham ma’lumotlarni qidirish mumkin.
2041 – Internetning o‘tkazuvchanlik darajasi hozirgidan 500 mln marotaba tezkor bo‘ladi.
2042 – Odamlardan iborat ilk “o‘lmas” nanorobotlar armiyasi shakllantiriladi. Kuchli immunitet tizimi bu armiya askarlarida yuzaga keladigan jarohat yoki xastaliklarni davolash ko‘nikmasiga ega bo‘ladi.
2043 – Nano-robotlar evaziga, inson tanasi turli shakl-shamoyilga solinadi. Ichki organlar uzoqqa chidaydigan kibernetik qurilmalar bilan almashtirila boshlaydi.
2044 – Sun’iy aql tabiiy aqldan ko‘ra milliard marotaba rivojlangan bo‘ladi.
2045 – Yer sayyorasi misli ko‘rilmagan darajada axborotlashib, ulkan kompyuterga aylanadi.
2099 – Texnologik o‘zgarish va taraqqiyot Yerdan Koinotga ko‘chadi.
To‘g‘ri, bularga hozir ishonish qiyin. Ammo, bugun atrofimizdagi jadal texnologik rivojlanishga nazar solsak, istiqbolda bu prognozlarning ro‘y berishiga ishonish mumkin. Hozircha kuzatamiz. Darvoqe, bu qarashlarning amalga oshishi uchun javobgarlikni Rey Kursveylning o‘ziga yuklab qo‘yamiz.
