Uch ekranli Galaxy X buklama smartfonining taqdimot vaqtini aytishdi
Janubiy koreyalik korporatsiya o‘zining buklanuvchi smartfoni – Galaxy X modelini CES 2018 ko‘rgazmasida taqdim etishini ko‘pchilik kutgan edi. Ammo bu tadbirda uning rasmiy namoyishi bo‘lib o‘tgani yo‘q, faqat qanaqadir yopiq yig‘ilishda Samsung ayrim kishilarga ushbu telefonni ko‘rsatgani aytilmoqda.
O‘QING: Samsung o‘zining Galaxy X buklama smartfonini «maxfiy yig‘ilish»da ko‘rsatdi
Shu kunlarda tarqalgan xabarlarga ko‘ra, Galaxy X qurilmasi buklanuvchi, har birining diagonali 3.5 dyuymlik ikkita ekranga ega bo‘ladi. Qurilma «ochilganida», ular birlashib, 7 dyuymlik yaxlit displeyga aylanadi. Yangi smartfon shu holida Galaxy Note 8 modeliga ko‘proq o‘xshab ketishi aytilayotir.
Shuningdek, Galaxy X tashqi tomonida yana bitta mini-ekran ham joylanadi. Smartfon «yopilganida», bu ekranchada har xil tezkor ma’lumotlar: bildirishnomalar, qo‘ng‘iroqlar, SMS va boshqalar aks etadi.
Samsung allaqachon bu model ustidagi ishlarning yakuniga yaqinlashib qolgan, demoqda manbalar. Galaxy X sinov namunalari shu yilning iyunida tayyor bo‘ladi, noyabr oyida esa uni ishlab chiqara boshlashadi. Devaysning taqdimoti 2019 yilning boshida bo‘lib o‘tishi kutilmoqda.
