Бошланди: аёлнинг сумкачасида яп-янги Galaxy Note 9 ёниб кетди
Жанубий кореялик гигантнинг Galaxy Note 7 фаблетлари оммавий тарзда тутаб, ёниб ва ҳатто портлаб кетиши сабабли қайтариб олинганидан хабарингиз бор. Компаниянинг кейинги айрим смартфонларида ҳам, кам ҳолларда бўлса-да, шунга ўхшаш воқеалар кузатилган.
Куни кеча АҚШда шунга ўхшаш яна бир ҳолат қайд этилган: кўчмас мулк агенти Дайан Чанг (Diane Chung) жанубий кореялик корпорация устидан судга ариза берди. Унинг таъкидлашича, жорий йилнинг 3 сентябрида унинг сумкасида ётган Galaxy Note 9 смартфони ўз-ўзидан ёниб кетган.
Чанг хоним лифтда кетаётиб смартфондан фойдаланаётганида, унинг бирданига «исиб кетгани»ни пайқаган. Шунда у телефонда гаплашишни тўхтатиб, уни сумкасига солган. Аммо орадан сал вақт ўтиб, сумка ичидан ғалати овозлар ва қуюқ тутун чиқаётганини сезган.
ЎҚИНГ: Galaxy Note 9’даги нуқсонни Samsung тан олмади!
Аризада кўрсатилишича, сумкасидаги барча нарсани смартфон билан бирга лифт полига тўккан. Телефон ёнишда давом этаётганини кўрган бошқа бир тасодифий йўловчи уни ўз кийимига ўраб кўтариб олган ва сувли челакка солган.
Ишлаб чиқарувчи бу масала юзасидан баёнот бериб, жумладан, шундай деган:
«Samsung истеъмолчиларнинг хавфсизлигига жуда жиддий ёндашади ва биз АҚШда фойдаланишда бўлган миллионлаб Galaxy қурилмаларининг сифатига кафолат берамиз. Биз шу пайтгача Galaxy Note 9 билан боғлиқ бирорта ҳам бу каби нохуш воқеа ҳақида ҳеч бир хабар олмагандик ва ҳозир вазиятни ўрганмоқдамиз».
ЎҚИНГ: Батареяларнинг портлаши: сабаб ва оқибатлари, ҳимояланиш усуллари
