Facebook ўз иловасини ишлатганларга ойига 20 доллардан пул тўлаяпти, лекин эвазига...
Дунёдаги энг йирик ижтимоий тармоққа ҳамда бир нечта мессенжерга эгалик қилаётган Facebook фойдаланувчиларнинг шахсий маълумотларини тўплашда чегара билмаётир. TechCrunch ресурси эълон қилган янги маълумотларда унинг ушбу йўналишдаги яна битта лойиҳаси фош этилган.
ЎҚИНГ: WhatsApp’дан фойдаланинг. Telegram, Facebook Messenger ва Google Allo’га ишонч йўқ!
Маълум бўлишича, Facebook компанияси 2016 йилдан бери айрим фойдаланувчиларга Facebook Research иловасини ўрнатгани учун ҳақ тўлаб келмоқда. Бу дастур ўзига хос VPN сервери саналади, лекин унинг асосий ўзига хослиги шундаки, фойдаланувчининг деярли барча шахсий маълумотларига кира олади!
Facebook Research иловасини ўрнатганлиги ва ишлатаётганлиги учун компания фойдаланувчиларга ойига 20 доллардан бериб келади. Аммо бунинг эвазига Facebook уларнинг жуда кўп махфий маълумотларини олади.
ЎҚИНГ: Facebook ва Youtube бир кун блокланиши Ўзбекистон иқтисодиётига қанча зарар етказади?
Guardian Mobile Firewall компаниясининг хавфсизлик бўйича мутахассисининг сўзларига кўра, Facebook бу илова орқали фойдаланувчиларнинг ижтимоий тармоқлар ва мессенжерлардаги ёзишмаларини, жўнатган ва қабул қилган видео ҳамда суратларини, электрон хатларини, браузер тарихини, жойлашувини ва бошқа маълумотларини тўлиқ кўриб боради.
TechCrunch нашрида бу ҳақдаги мақола чоп этилгач, Facebook дарҳол ушбу илованинг iOS тизимларидан олиб ташлангани ҳақида баёнот берган. Лекин Androidтизими учун Facebook Research дастури ҳамон амал қилмоқда. Компаниянинг таъкидлашича, мазкур илова кишилар интернетдан қандай фойдаланишаётганини янада яхшироқ тушуниб олиши учун хизмат қилади.
Terabayt.uz сайтида Facebook кузатувини чеклаш йўллари, бу таъқибдан ҳимояловчи махсус кенгайтма, бу компания қандай жосуслик қилаётгани ҳақида бир қатор мақолалар эълон қилинган.
ЎҚИНГ: Facebook тан олди: у Android-смартфонлардаги қўнғироқ ва SMS-хабарларни кузатмоқда!
