Ҳайратга лойиқ хакер: ФБР эплай олмаган Apple серверларини мактаб ўқувчиси бузиб кирди!
Apple корпорацияси кейинги бир йил мобайнида ўз серверларига бир неча бор хакерлик ҳужумларини муваффақиятли тарзда амалга оширган шахсни аниқлади. Буни қарангки, у Австралиянинг Мельбурн шаҳрида яшайдиган ўсмир – мактаб ўқувчиси бўлиб чиқди!
ЎҚИНГ: Ўзбекистонлик «хакер»лар банкоматни 15 дақиқада «бузиб», халқаро танловда учинчи бўлишди
Умуман олганда, Apple ўз маҳсулотларининг ўта мустаҳкам ҳимояга эга эканлиги, фойдаланувчиларнинг маълумотларини давлат хизматларига сотмаслиги билан ҳақли равишда фахрланиб келади. Ҳатто 2015 йилнинг декабр ойида АҚШнинг Сан-Бернардино шаҳарчасида ҳужум уюштирган Сайед Фаруқ исмли террорчининг iPhone қурилмасини блокировкадан чиқариш ва смартфон тизимига кириш учун Федерал қидирув бюроси ёрдам сўраганида, купертинолик гигант рад этган.
Бу гал эса, Apple’нинг ўзи хакерни ушлашда ёрдам сўраб, мазкур идорага мурожаат қилди, деб ёзади TheAge нашри. ФҚБ (ФБР – FBI) бу масалада ҳамкорлик қилиш учун Австралия полицияси билан боғланган.
Махсус рейдда қўлга олинган хакер ўсмир чиндан ҳам Apple серверларига бир неча бор кирган, у ердан 90 гигабайт ҳажмидаги ҳимояланган файлларни кўчириб олган экан. Шунингдек, бир нечта Apple мижозларининг iCloud аккаунтларига кира олган. Бу маълумотларнинг барчаси унинг уй компьютеридаги «Hacky hack hack» номли жилдда сақланаётган экан. Шунингдек, жиноят қуроллари ҳисобланган иккита Apple ноутбуки, смартфон ва ташқи хотира диски ҳам мусодара қилинган.
ЎҚИНГ: Хакерлар тарихдаги энг йирик ўғирликни содир этишди
Мельбурнлик бу ёш хакер, хабарга кўра, хакерлар орасида яхшигина машҳур экан. У купертиноликларнинг серверларини бузиб кира олгани ҳақида WhatsApp орқали айрим дўстларига мақтангани ҳам аниқланган.
Тергов-суриштирув ишларида аниқланишича, ўқувчи Apple маълумотларига кириш имконини берувчи шифрлаш калитларини танлай билган. Купертинолик компания унинг айнан қандай маълумотларни ўғирлаганини ошкор этмасликни сўраган.
Хакер ўқувчи ўз айбини тан олган ва Apple тармоғини бузганига сабаб сифатида айтишича, ўзи шу корпорациянинг ишқибози бўлиб, унда ишлашни истар экан. Ҳозирда у қўлга олинган, иш юзасидан суд эса 20 сентябрда бошланади. Бу борадаги янгиликларни бирга кузатамиз – биздан узоқлашманг.
