Android 11 онлайн тақдимотини кутяпсизми? Хомтама бўлмай қўяверинг!
Google компанияси бу йил коронавирус туфайли Google I/O конференциясини бекор қилгани ҳақида ёзгандик. Қидирув гиганти 3 июнь куни фақат онлайн намойиш ўтказиб, Android 11 операцион тизим талқинининг бета-версиясини оммавий тақдим этишини айтган.
ЎҚИНГ: Android 11'да iOS'даги каби функция бўлиши тасдиқланди
Энди эса режалар тағин ўзгарди – Google ҳатто Android 11 Beta Launch Show номли онлайн маросимни ҳам ўтказмайдиган бўлди! Бу ҳақда Android дастурчилар жамоаси бугун – 30 май санасида Twitter орқали расман хабар берди:
We are excited to tell you more about Android 11, but now is not the time to celebrate. We are postponing the June 3rd event and beta release. We'll be back with more on Android 11, soon.
— Android Developers (@AndroidDev) May 30, 2020
«Биз сизларга Android 11 ҳақида кўпроқ сўзлаб беришдан мамнун бўлардик, лекин ҳозир байрамлар вақти эмас. Биз 3 июнга режаланган тадбир ва бета-версия релизини кейинроққа қолдирамиз. Яқин орада биз Android 11 тўғрисидаги янги тафсилотлар билан қайтамиз», – дейилади Google дастурчиларининг расмий баёнотида.
Таъкидлаб ўтиш муҳимки, нафақат онлайн тадбир бекор қилинди, балки Android 11 операцион тизимининг биринчи оммавий бета-версиясининг релизи ҳам кейинга қолдирилди. Уларнинг айнан қачонгача кечиктирилгани эса номаълум – бундан бохабар бўлиш учун янгиликларни биз билан бирга кузатиб боринг.
ЎҚИНГ: Ҳали чиқмаган Android 11’ни эски ва арзон Redmi смартфонига аллақачон ўрнатиш мумкин!