Apple Music‘даги пулли обуначиларнинг сони 20 миллионга етди
Apple компаниясининг Apple Music номли мусиқий сервисидаги тўлов қобилиятига эга обуначиларнинг сони 20 миллионга етди, деб хабар бермоқда BillBoard нашри.
Жорий йилнинг сентябрь ойида АҚШда ўтказилган iPhone 7 тақдимотида компания раҳбари Тим Кук Apple Music обуначиларининг сони 17 миллион нафардан ортганини маълум қилган эди. Шундан буён сервисдаги тўлов қобилиятига эга обуначиларнинг миқдори 3 миллионга кўпайган.
Apple вице-президенти Эдди Кьюнинг нашрга берган интервьюсида айтишича, мусиқий сервис обуначиларининг ярмидан ортиғи АҚШдан ташқарида истиқомат қилади, 60 фоиздан ортиқ обуначилар эса сўнгги 12 ой давомида iTunes хизматидан ҳеч қандай контент харид қилишмаган.
Швециянинг Spotify сервиси Apple Music ресурсининг асосий рақобатчиси ҳисобланади. 2016 йилнинг сентябрь ойида ушбу сервисдаги тўлов қобилиятига эга обуначиларнинг сони 40 миллионга етган. Spotify‘нинг ойлик фойдаланувчилар аудиторияси эса 100 миллондан ортиқ обуначини ташкил этади.
