GTA V’дан ҳам ўзиб кетган бу ўйин янги рекорд ўрнатди!
Epic Games дўкони энг қизиқарли экшен ўйинлардан бири – Grand Theft Auto 5’ни вақтинча текинга тарқатяпти! Шу боисдан ҳозирда уни ўйнаётганлар сони жуда юқорилаб кетган.
ЎҚИНГ: Вақтинча бепул тарқатилаётган GTA V ўйинини ўта реалистик версияда чиқаришди! (видео ва ҳавола)
Terraria номли яна бир қизиқарли ўйинда 16 май куни йирик янгиланиш бўлган эди. Бу – яшаб қолиш учун курашиладиган симулятор бўлиб, ушбу апдейтдан сўнг янада оммалашиб кетди.
SteamDB портали маълумотига кўра, «Саёҳат якуни» ёки Journey’s End деб номланувчи янгиланиш эълон қилинганидан бир неча соат ўтибоқ Terraria’да бир вақтнинг ўзида онлайн бўлганлар сони 489 886 нафарга етган. Бу эса рекорд кўрсаткич ҳисобланади; таққослаш учун келтириб ўтсак, GTA V ўйинида бир вақтнинг ўзида онлайн бўлганлар сони 240 минг нафардан салгина ошади.
Terraria’нинг оригинал версияси компьютерларга 2011 йилдаёқ чиққан, кейинроқ уни PlayStation 4, Xbox One, Nintendo Switch ва бошқа консолларга ҳам тақдим этишган.
Journey’s End янгиланиши билан бу ўйинга бир қатор янги буюмлар, рақиблар, мини-биомлар ва механикалар қўшилган. Дастурчиларнинг таъкидлашларича, келажакда унга Steam устахонасидаги модификацияларнинг тўлақонли интеграциясини ҳам қўшишади.
