Apple нега iPod'нинг 2 моделидан воз кечди, уларни нима "ҳалок" қилди?

Apple компанияси ўзининг 2 та классик медиа воситалари -- iPod Nano ҳамда Shuffle плеерларини бундан кейин ишлаб чиқармаслиги билан боғлиқ режаларини эълон қилди.

2005 йилдан бошлаб ишлаб чиқарилаётган iPod Nano ва Shuffle – Apple Music хизматини қўллаб-қувватламайдиган сўнгги гаджетлар бўлишди.

Бу плеерлар 2015 йилдан буён оммалашиб келаётган Apple Music мусиқий хизматини қўллаб-қувватламайдиган сўнгги электроника воситалари бўлди. Компания вакилларининг сўзларига кўра, Apple шу йўл билан iPod қурилмалари туркумини ихчамлаштирмоқчи. Энди бу туркумда фақатгина iPod Touch гаджети қолади.

iPod Nano ва Shuffle аллақачон интернет-дўконларнинг маҳсулотлар рўйхатидан олиб ташланган. Тез орада уларни анъанавий дўкон расталарида ҳам учратмайсиз.

iPod touch -- ҳозирча ишлаб чиқариладиган ягона iPod бўлиб, Apple энди унинг хотирасини 2 карра оширади: 32 ГБ ($199) ва 128 ГБ ($299) хотира талқинларига эга.

iPod nano охирги марта 2012 йилда янгиланган бўлиб, ўшанда компания унга Bluetooth стандартини жорий қилган эди. Натижада, уни симсиз аудио-қулоқчин ва аудио-карнайларда тинглаш имкони туғилган. 

Экспертлар доимо iPhone смартфонини iPod плеерининг "қотили" деб ҳисоблаб келишган. Бироқ, маълум бўлишича, iPod'ни бозордан чиқариб юбораётган муҳим омил Apple Music ва Spotify каби онлайн мусиқа хизматлари бўлган. Боиси, фойдаланувчилар бу хизматлар ёрдамида айфонлари орқали ҳам хоҳлаган мусиқани тинглашлари мумкин.