РАСМАН: Vivo мутлақо ромсиз Apex’ни сотувга чиқармоқчи, тўлақонли тақдимот санаси маълум (+видео)
Кейинги йилларда етакчи смартфонсозлардан кўра унча танилмаган компаниялар турли инновацияларда биринчи бўлаётганига дуч келмоқдамиз. Жумладан, Vivo бренди MWC 2018 анжуманида қисман намойиш қилинган APEX номли концептуал смартфонини тақдим этган.
ЎҚИНГ: Хитойда Snapdragon 845'га эга илк смартфон тақдим қилинди
Vivo Apex’нинг тижорат мақсадларида оммавий ишлаб чиқаришга жорий этилиши масаласи шу пайтгача сўроқ остида эди. Ишлаб чиқарувчи куни кеча унинг барибир сотувга чиқишини расман маълум қилди. Хабарга кўра, Vivo Apex’нинг тўлақонли тақдимоти шу йилнинг 12 июнида Шанхай шаҳрида бўлиб ўтади.
Айтиш керакки, бу қурилманинг аввалроқ намойиш этилган прототипи ҳар томонидан минимал даражадаги ҳошияларга эга бўлган 6 дюймлик OLED-дисплей билан жиҳозланган эди. Унда бармоқ изи сканери экраннинг ўзига жорий этилган, олд камера эса корпуснинг юқори қирраси ичидан чиқади. Vivo Apex ҳозирда энг илғор бўлиб турган саккиз ядроли Snapdragon 845 процессори ҳамда замонавий USB Type-C порти билан таъминланган. Расмий тақдимотигача унинг айрим хусусиятлари ўзгартирилиши эҳтимоли ҳам йўқ эмас.
Мана, Vivo Apex модели тақдимотига бағишлаб тайёрланган янги видеолавҳани ҳам бирга кўрамиз:
Таъкидлаш керакки, Vivo аллақачон ушбу смартфоннинг иккинчи талқинини ҳам тайёрлаган. Балки 12 июнда тақдим этиладиган модел ҳам айнан шу бўлар – буни ҳам тез орада билиб оламиз. Бу борадаги янгиликларни биз билан бирга кузатинг.
ЎҚИНГ: Vivo дунёдаги энг инновацион смартфоннинг янгиланган версиясини тайёрламоқда
