Samsung Galaxy A71 5G TENAA'да
Samsung Galaxy A71'нинг 5G варианти ҳақида олдин ҳам хабар берган эдик. Илгарироқ, ушбу субфлагман 3C сертификатлаш агентлиги ва Geekbench бенчамаркида кўриниш берган эди.
Ҳали тақдим қилинмаган қурилма, мана, TENAA листингида SM-A7160 модель рақами билан пайдо бўлди. Бу ҳақида GSMArena сайти хабар бермоқда.
Олдин ҳам маълум қилинганидек, A71 5G анчагина катта — 4 370 мА/соат аккумуляторга эга бўлиб, 25 ваттда (11V, 2.25A) қувватлана олади. Смартфоннинг «ичак-човоғи» 162.6 х 75.5 х 8.1 миллиметр ҳажмли корпус ичига жойлаштирилиши, вазни эса 185 грамм бўлиши керак.
Афсуски, девайс дизайни ҳақида билганларимиз ҳозирча шулардангина иборат. Дисплей диагонали, экран тафсилотлари, селфи камера дизайни ва жойлашуви ҳақида эса маълумот мавжуд эмас. Ҳозирга қадар Galaxy A71 5G'нинг рендерлари ёки суратлари ҳам сизиб чиқмаган.
Аммо смартфоннинг Samsung ўзи ишлаб чиқарувчи Exynos 980 чипида ишловчи талқини ички жиҳатлари ҳақида талайгина маълумотга эгамиз. TENAA'да кўрсатилишича, қурилма оператив хотираси 8ГБ бўлиб, ташқи хотира чипи ҳам қўллаб-қувватланади. Хотира сиғими варинатлари ҳақида эса маълумот йўқ.
Камера борасида эса, A71 5G 64МП асосий камерага эга бўлади. Бунга 12 мегапикселлик ультра-кенг, 5МП макро ва 5МП сатҳ камералари ҳам шерик қилиниши мумкин. Селфи камера резолюцияси эса 32МП. Юқоридаги жадваллардан кўриниб турган бошқа жиҳатларга Type-C порти, 3.5 мм аудио жек, Bluetooth 5.0, Wi-Fi ac ва Android 10 киради. Интерфейс эса One UI 2.0 ёки 2.1 дан бири бўлиши мумкин.
