Samsung смарт-узук тайёрламоқда – энди телефоннинг кераги бўлмайди!

АҚШ Патентлар ва савдо белгилари бошқармаси – USPTO сайтида Samsung компаниясининг янги ишланмаси тавсифи пайдо бўлди. Мазкур мобил гаджет шунчаки «Тақилувчи қурилма» (Wearable device) деб номланган.

ЎҚИНГ: NFC Ring: янги технологиядаги смарт узук

Ушбу умумий ном остида бармоққа тақиладиган «ақлли» узук кўзда тутилган. Жанубий кореялик гигантнинг режасига кўра, ушбу девайс уяли алоқа телефони функцияларини бажариши лозим.

Сайтда эълон қилинган мазкур ҳужжат дизайнерлик патенти тоифасига мансуб, шу боис қурилманинг техник тафсилотлари ошкор этилмаган. Аммо ундаги суратлар смарт-узукнинг айрим функциялари ҳақида тасаввур ҳосил қилишга имкон беради.

Уларда кўриниб турганидек, янги гаджет кирувчи телефон қўнғироғини қабул қилиш ҳамда рад этиш/тугатиш тугмачалари билан таъминланган.

ЎҚИНГ: Ноодатий никоҳ узуклари қандай кўринишга эга?

Узукнинг орқа томонида бир нечта майда тешикчалар кўзга ташланади – афтидан, бу динамик бўлса керак. Узук орқали қўнғироқларга жавоб бериш учун фойдаланувчи у тақилган қўлини қулоғига яқин келтириши кифоя.

Samsung мазкур патентни олиш учун аризани 2016 йилнинг май ойидаёқ берган экан. USPTO сайтида эса бу ҳужжат куни кеча – 2018 йил 26 июнда эълон қилинган. Жанубий кореялик компания патентлаштирилган ушбу қурилмаси ҳақида бирор маълумот бермаган.

Айтиш керакки, телефон қўнғироқлари учун узукдан фойдаланиш ғояси унчалик ҳам янги эмас. Жумладан, шундай функцияларга эга ва «сувдан қўрқмас» битта гаджет аллақачон сотувга чиққани хусусида ҳам маълумот берганмиз.

ЎҚИНГ: ORII – смартфонга камроқ қарашга ёрдам берувчи ақлли узук (+видео)

Лекин Samsung ишланмаси, бошқаларидан фарқли ўлароқ, телефонсиз ҳам ишлайдиган бўлиши кутилмоқда.