ZTE'нинг тақдири ҳамон номаълумлигича қолмоқда: АҚШ Сенати санкцияни қайта бошлаш тарафдори
Чамаси, Хитойнинг ZTE компанияси АҚШ бозорига қайтганини байрам қилишига ҳали анча борга ўхшайди. Гарчи, АҚШ ҳукумати билан битим имзоланган бўлса-да, санкция таҳдиди ҳамон сақланиб турибди.
Эрон ва КХДРга иқтисодий эмборга жорий этилганига қарамай, ушбу давлатлар билан бизнес ҳамкорликни давом эттиргани учун ZTE компаниясига яқин 7 йилгача АҚШда фаолият кўрсатишга чеклов чораси қўлланилганди. Яъни АҚШлик ишлаб чиқарувчилар 2025 йилгача мазкур компанияга комплектловчи қисмлар ва дастурий таъминотларни сотмайди. Бу эса биринчи навбатда смартфонлар учун процессорлар ва Google сервисларига тегишли.
ЎҚИНГ: Нокаутми, нокдаунми? ZTE’нинг аҳволи ҳақида
Лекин бир оз вақт ўтиб, АҚШ билан ZTE компанияси ўртасида муроса келишуви имзоланди. Санкциясини бекор қилиш эвазига компания бир миллиард доллар жарима тўлаши керак, яна компаниянинг 400 миллион доллари музлатилади. Бу пул келгусида йўл қўйилиши мумкин бўлган хатолари учун тавон пули ҳисобланади, яна бир жазо шундан иборатки, компания ўзининг раҳбарият таркибини янгилайди ва Америка томонининг компания фаолиятини назорат қилиб боришига рухсат беради.
Аммо АҚШ Сенати масаланинг бундай ечимидан қониқмаяпти. Сенаторлар мудофаа борасида қонун лойиҳасига овоз берар экан, ZTE компаниясига нисбатан санкцияни қайта жорий этиш бўйича талабни илгари сурмоқда. Бундан ташқари, сенаторлар президент Дональд Трампни ҳам миллий хавфсизликни таҳдид остига қўяётганликда айблашмоқда, ахир аввал ҳам бир неча бор ZTE компанияси Хитой ҳукумати фойдасига жосусликда айбланган эди-да.
ЎҚИНГ: Apple Xiaomi'ни суд залига чақиради
Тўғри, Сенатда овоз бериш,бу ҳали якуний қарор дегани эмас. Гап шундаки, бу ҳужжат Оқ Уйнинг санкцияни бекор қилиш бўйича қонун лойиҳасига зиддир.
Бундан ташқари, Сенатнинг қонун лойиҳаси АҚШ Конгресси томонидан ҳам қўллаб қувватланиши, кейин уни Дональд Трамп имзолаши керак бўлади. Трамп, эса кўринишидан ZTE томонида.
