Apple кечагина буклама iPhone учун патент олди
Ҳозирда кўплаб смартфонсозлар қайишқоқ дисплейли буклама телефон яратиш устида ишлаётганидан хабарингиз бор. Шулардан иккита етакчи – Samsung ҳамда Huawei компаниялари жорий йилнинг ўзидаёқ шундай моделларини тақдим этишга ҳаракат қилишаётир.
ЎҚИНГ: Lenovo’нинг ишлаётган ҳолдаги буклама смартфонини «жонли» видеода кўринг!
Мазкур пойгада Apple компаниясининг амалий қадамлари ҳам кўзга ташлана бошлади. 9to5Mac ресурсининг хабарига кўра, куни кеча – 16 октябрь куни купертинолик корпорация букланувчи дисплей учун патент олган. Айни дамда бунақа iPhone ҳали яралгани йўқ, аммо Apple кўп йиллардан буён букланувчи дисплей концепциялари устида ишлаб келаётир. Айнан шундай экран технологиялари iPhone X ҳамда iPhone XS моделларида аллақачон қўлланган. Уларда дисплейнинг пастки қисми қайрилиб, ўзининг остига букланган ва экран атрофидаги ромларнинг минимал даражага келтирилишига асос бўлган.
Навбатдаги патент аризасида эса дисплейнинг уч хилда букланиш усули баён этилган. Улардан биринчисида экран қурилманинг ички томонида яширинади, иккинчисида эса – корпуснинг ташқи юзасида қолади. Учинчи усулда эса шу икки вариант ҳам баравар қўлланади.
Айни дамда смартфонлар бозорига бундай ечимга эга моделлар чиқмаган. Лекин ёйилганида планшет, йиғилганида смартфон бўлувчи қурилмалар даврига унчалик ҳам кўп вақт қолгани йўқ.
Энг сўнгги айфонларни ва купертиноликнинг бошқа айрим моделлардаги смартфонларини Terashop.uz интернет-дўконимиздан қулай нархларда, онлайн усулда харид қилиш имконияти мавжуд. Бунда уйингиз ёки офисингиздан чиқмасдан туриб онлайн буюртма бериш, ўзингизга қулай усулда тўлов қилиш, ҳақини товар қўлингизга текканидан кейин тўлашингиз мумкинлиги каби имкониятлар сизга ҳам маъқул келишига ишонамиз.
