Кўплаб Xiaomi смартфонлари эгаларини бир имкониятдан маҳрум этишди

2016 йили тақдим этилган Pokemon Go мобил ўйини ҳозирда ўша пайтдагидек оммабоп бўлмаса-да, барибир унинг ишқибозлари кўп. Унинг ишлаб чиқувчиси – Niantic компанияси ўйинда ноҳалол усуллар қўлланишига қарши фаол курашиб ҳам келади.

ЎҚИНГ: Барчанинг ақл-ҳушини ўғирлаган Pokemon GO қанақа ўйин?

Ноҳалол усуллардан бири читерлик (инглизча «cheat» – «фирибгарлик, алдов» сўзидан) ҳисобланади. Бу – кўпчилик бўлиб ўйналувчи ўйинларда чет дастурлар ва ностандарт аппарат таъминотларини қўллаган ҳолда ноҳалол тарзда устунликка эга бўлишдир.

Буни қарангки, яқиндан бери Niantic алгоритмлари Xiaomi ҳамда Redmi брендларининг мобил қурилмаларида қўлланувчи MIUI прошивкасини читерлик, деб ҳисоблай бошлаган. Натижада ушбу смартфонларда Pokemon Go ўйини блоклаб қўйилган ва уларнинг фойдаланувчилари покемон овлаш имконидан маҳрум бўлишган.

Reddit ижтимоий янгиликлар ресурсидаги фойдаланувчилар, Pokemon Go қоидаларига зид бирор иш қилмаган бўлсалар-да, аккаунтлари вақтинча блокланганидан шикоят қила бошлашган. Фаол муҳокамалардан сўнг аниқланишича, мазкур ҳолат Xiaomi компаниясининг айрим смартфонларида, шу жумладан, Redmi Note 7 (сотиб олиш) ҳамда Redmi Note 5 моделларида кузатилаётган экан. Афтидан, мазкур муаммо MIUI прошивкасига ёки улардаги иловаларга бориб тақалади.

Niantic ҳозирча мазкур ҳолат юзасидан бирор расмий изоҳ бермаган.

ЎҚИНГ: Барча Xiaomi смартфонлари учун энг керакли илова чиқди!