Oppo «шаршара дисплей»ли смартфонини эълон қилди
Корпус олд юзасининг имкон қадар кўпроқ юзасини экран эгаллаб олган қурилма яратиш борасида смартфонсозлар пойгага киришишган. Жумладан, кўпгина технологиялари билан етакчи компанияларни доғда қолдириб келаётган Vivo шунақа смартфонни яқинда тақдим этмоқчи.
ЎҚИНГ: «Жонли» сурат: Хитойликлар экран ромсизлиги 100 фоиздан ошиқ бўлган смартфон тайёрлашди!
Oppo ҳам ўз ҳамюртидан қолишмасликка ҳаракат қилиб, смартфон дисплейининг янгича дизайнини намойиш этди. Компания уни «шаршара дисплей» деб номламоқда.
Мазкур компания аввал ҳам экранининг чеккаси қайрилган смартфонлар чиқарган, масалан – Oppo Find X. Лекин бу галгисида дисплейнинг ён томонлари янада нарироқ кетган ва 88 даражали бурчак остида букилган. Шу тариқа, смартфон корпусининг ён қирралари умуман йўқ қилинган, шунингдек – одатда у ерда жойлашувчи тугмачалар ҳам.
Кўринишидан жуда қизиқарли, аммо бундай смартфонни амалда қўллаш қанчалик қулай бўлар экан? Ушлаганда экраннинг ёнлари тегинишдан таъсирланиши, натижада смартфон буни бирор буйруқ сифатида қабул қилиши мумкин-ку? Бундан ташқари, Oppo ҳали бундай смартфоннинг ёқиш-ўчириш ва овозини кўтариш-пастлатиш тугмачалари учун ҳам жой топиши керак.
Нима бўлганда ҳам, яқин орада тақдим этиладиган Oppo смартфонларидан бирида худди шундай – «шаршара дисплей» бўлишини кутиш мумкин.
ЎҚИНГ: 2018 йилнинг энг, энг, энг... смартфонлари (JerryRigEverything видеоталқини)
