Puma ҳали 1986 йилиёқ чиқарган «ақлли» кроссовкасини янгиланган талқинда тақдим этди!
Асосан спорт кийимлари ва анжомлари ишлаб чиқаришга ихтисослашган Puma компанияси ҳали 1986 йилдаёқ RS-Computer Shoe русумли «ақлли» кроссовка чиқарган эди. Энди у мазкур оёқ кийимининг янгиланган моделини тақдим этди.
ЎҚИНГ: Puma боғичи ўз-ўзидан боғланадиган кроссовкалар ишлаб чиқаришни режалаштирмоқда
Янги версия ўша олдинги кроссовканинг оригинал дизайнини сақлаб қолган, шу билан бирга янгича – замонавий технологик имкониятларга эга бўлган. Масалан, 1986 йилги RS-Computer Shoe юрилган масофа ҳақида маълумот тўплаб борар, уни махсус коннектор ёрдамида Commodore 64 ёки Apple IIE компьютерларига улаб, маълумотлари ўтказилар эди. Йиғилган ахборот компьютер хотирасига кўчирилганидан кейингина «ақлли» кроссовка эгасида у билан танишиш имкони бўлар эди.
Янгиланган RS-Computer Shoe эса замонавий Bluetooth модулига эга – тўпланган маълумотлар у орқали iOS ёки Android-смартфонга узатилади. Олинган ахборот эса махсус илова томонидан қайта ишланади; бу дастур ҳам ўша оригинал дизайнини сақлаб қолган.
Кроссовканинг ҳар бир пойи ичига махсус акселерометрлар ўрнатилган бўлиб, улар фойдаланувчи қадамларини санайди ва у сарфлаган калорияни ҳисоблайди. Шунингдек, кун давомида босиб ўтилган масофани ҳам аниқлаб беради.
RS-Computer Shoe хотираси сўнгги 30 кунги маълумотларни сақлаб қола олади. Ҳар бир ой бошида эски маълумотлар хотирадан ўчирилиб, яна янгидан бошланади.
ЎҚИНГ: Кун янгилиги: Xiaomi'дан янги «ақлли» кроссовка
«Ақлли» кроссовканинг бошқарув панели ёруғлик-диодли иккита индикатор билан жиҳозланган. Улардан бири керакли масофа босиб ўтилганлиги ҳақида хабар беради, иккинчиси эса кроссовкадаги литий-полимерли аккумуляторнинг қуввати қанча эканини кўрсатиб туради.
Айтиш керакки, RS-Computer Shoe кроссовкалари компаниянинг расмий сайти орқали фақатгина АҚШ ва Япония ҳудудида сотилади. Токио, Берлин ва Лондон аҳолиси эса уни ишлаб чиқарувчининг фирма дўконларидан олишлари мумкин. Янгиланган «ақлли» кроссовкадан атиги 86 жуфт чиқарилган бўлиб, ҳозирча нархи маълум қилинмаган.
ЎҚИНГ: Xiaomi баскетболчилар учун ажойиб кроссовка яратди, нархи 45 доллар
