Уч камерали – флагман ҳамда арзон, аммо Face ID тизимли iPhone’ларнинг илк суратлари чиқди

Apple оламининг энг нуфузли таҳлилчиси – KGI Securities компанияси вакили Минг-Чи Куо (Ming-Chi Kuo) жорий йилнинг кузида қандай iPhone моделлари чиқишини ҳали январдаёқ маълум қилганди. Унга кўра, сентябрда купертинолик гигант яна учта смартфон тақдим этади: 6,1 дюймлик, суюқ кристалли дисплейга эга айфон, 5,8 ва 6,5 дюймлик OLED-дисплейли иккита iPhone.

ЎҚИНГ: Бу йил қандай iPhone’лар чиқиши аниқ бўлди

Мазкур айфонлар ҳақида ҳар хил маълумотлар чиқишда давом этаётир; жумладан, уларнинг энг каттаси – 6,5 дюймлик OLED-дисплейга эга iPhone сурати эълон қилинди. Унга кўра, якка кристалли Apple A12 процессорига эга бўлган ушбу флагман уч модулли асосий камера билан жиҳозланади.

Тўғри, уч объективли бош камерага эга айфонларнинг чиқарилиш муддати ҳақида турли фикрлар мавжуд. Айримлар бунақа iPhone келаси йилдагина чиқарилишини таъкидлашса, бошқалар купертиноликлар шу йилдаёқ Huawei P20 Pro рақибини тақдим этади, деган фикрдалар.

Юқоридаги суратдан аён бўлаётирки, Apple флагманининг корпуси ўлчамлари 157х77 миллиметрга тенг. Яъни, унинг корпуси катталиги бултурги – 5,5 дюймлик экранли iPhone 8 Plus билан бир хил.

ЎҚИНГ: iPhone’ нинг 2019 йилги камералари нималарга қодир?!

Шунингдек, купертинолик гигантнинг кузда намойиш этадиган яна битта модели – экрани 6,1 дюймга тенг бўлган, якка камерали айфонининг ҳам уч ўлчамли модели суратлари эълон қилинди. Худди «ака»си каби, 147х71 миллиметрлик бу iPhone ҳам дисплей «кемтиги»да True Depth тизимига эга.

Ҳозирча инсайдерлар iPhone X’нинг бевосита издоши – диагоналига 5,8 дюймлик OLED-экранга эга айфон суратларини чиқаришмаган.

Дарвоқе, хитойлик гигант камералар бўйича янада илғор смартфонини тайёрлашга ҳам аллақачон киришган, деган гаплар юрибди.

ЎҚИНГ: Тўртта бош камерали Huawei Mate 20 видеосини кўрамиз!