Учувчисиз учар қурилма парвоз рекордини ўрнатди

Европа авиация ишлаб чиқариш концерни бўлмиш, Airbus томонидан яратилган учувчисиз учар аппарат  – Zephyr S ҳавода 15 кундан буён тинмай парвоз қилмоқда. Бу билан ушбу аппарат узоқ вақт самода қолиш бўйича дронлар ичида рекорд қўйди.

Zephyr S’нинг биринчи парвози 2018 йил 11 июлда бошланган эди. Дрон Аризона штати полигонидан учирилган ва ҳамон ҳавода қолмоқда. «Зефира»нинг давомий парвозидаги якуний рекорд у ерга қўнганидан кейин қайд этилади, аммо бу қачон содир бўлади? Ушбу саволга  Airbus ҳозирча аниқлик киритгани йўқ. Назарий жиҳатдан олиб қараганда, ушбу дрон ҳавода уч ойгача қолиши мумкин экан.

ЎҚИНГ:Шавкат Мирзиёев дронлар ишлаб чиқаришни жорий этишга чақирди

Учувчисиз  учар қурилмалар орасида узоқ вақт парвоз қилиш бўйича аввалги рекорд  Zephyr аппаратининг прототипи томонидан ўрнатилган эди. Ўшанда қуёш батареясидан қувватланадиган бир жуфт электромоторли дрон ҳавода икки ҳафта тура олган.

«Зефира»нинг канотлари ёйилганда 28 метрга етади ва устки томони тўлалигича қуёш батареяси билан қопланган. Аппарат 21,3 километр баландликда парвоз қилиб, беш килограммгача юкни элта олади. Zephyr S’ни серияли ишлаб чиқариш июль ойининг ўрталарида Британиянинг Форнборосида бошланганди. Дастлабки учта аппарат Британия ҳарбийлари учун мўлжалланган.

ЎҚИНГ:АҚШ суди дронлар рўйхатга олинишини бекор қилди