Xiaomi яна иккита – Redmi Note 6 ва Redmi Note 6 Pro смартфонларини тайёрлади!
Турли-туман моделлардаги мобил алоқа қурилмалари чиқариб чарчамаётган Xiaomi корпорацияси яқиндагина янги бренд остидаги Pocophone F1 смартфонини намойиш қилганди. Энди эса навбатда унинг энг илғор инновацион жиҳатларга эга ромсиз флагмани турибди.
ЎҚИНГ: Xiaomi Mi Mix 3 тақдимоти яқин – у Саноат вазирлигида сертификациядан ўтди!
Куни кеча – 23 август куни «хитойча Apple»нинг булардан ташқари яна иккита қурилма тайёрлагани маълум бўлди. Булар компаниянинг ҳамёнбоп смартфонлари туркумига оид Redmi Note 6 ҳамда Redmi Note 6 Pro моделларидир.
АҚШнинг Федерал алоқа комиссияси – FCC маълумотлар базасида ушбу икки русумдаги смартфоннинг муваффақиятли тарзда синовдан ўтказилганлиги ҳақида маълумот пайдо бўлди. Ушбу идора фақат тўла тайёр бўлган қурилмаларнигина текширувдан ўтказишини ҳисобга олсак, Redmi Note 6 ва унинг Pro-версияси тақдимоти яқин. Унгача фақат уларнинг дастурий таъминотида ўзгаришлар бўлиши мумкин, холос.
Маълум бўлишича, Redmi Note 6 смартфонининг модел рақами M1806E7TG бўлиб, у Bluetooth 5.0 LE, Wi-Fi 802.11ac (2,4 ГГц + 5 ГГц), GPS ҳамда 4G VoLTE модуллари билан таъминланган. Ушбу гаджет Android 8.1 Oreo’га асосланган MIUI 9 прошивкаси билан ишлайди. Аммо тақдимот вақтигача ёки савдога чиқарилгунича уни MIUI 10’гача янгилашлари, ҳатто ўша прошивка Android 9.0 Pie базасида тайёрланиши ҳам мумкин. Redmi Note 6 Pro модели эса FCC маълумотлар базасида M1806E7TH модел рақами остида қайд этилган.
Redmi Note 6 ҳамда Redmi Note 6 Pro қачон расман намойиш этилиши номаълум, аммо аллақачон тайёрлаб бўлинганини инобатга олсак, Xiaomi бу ишни кўп ҳам чўзиб ўтирмаса керак. Мазкур компаниянинг аллақачон савдога чиқарилган аксарият смартфонлари эса юртимизда ҳам расмий кафолат билан сотилмоқда.
