Яна иккита шаҳримизда «Яндекс.Такси» иш бошлади, лекин Тошкент ҳокими ўринбосари унга қарши!
Ўзбекистонда ўзининг турли хизматларини тақдим этиб келаётган Яндекс компанияси ўзининг Такси сервисини Фарғона ва Марғилонда ҳам ишга туширди. Бу ҳақда компания хабарига таяниб «Спот» нашри ёзмоқда.
ЎҚИНГ: Яндекс Тошкентда транспорт ҳаракатини кўрсата бошлади
«Фарғона ва Марғилон аҳолиси бизнинг иловамиз ёрдамида буюртма бериш жараёнини тўлиқ назорат қилишлари ва ҳайдовчи йўловчини олиш жойига келаётганини ҳамда у ҳозир қаерда эканлигини кўришлари мумкин бўлади», – дейди «Яндекс.Такси»нинг Ўрта Осиё бозорларини ривожлантириш бўйича ижрочи директори Тамирлан Шапиев.
Сервисда Фарғона ва Марғилонда ҳам, бошқа шаҳарларда бўлгани каби, ўзининг ҳайдовчилари ва машиналари бўлмайди. Компания маҳаллий йўловчи ташувчилар билан ҳамкорлик қилади.
ЎҚИНГ: «Яндекс.Такси» орқали вертолёт буюртма қилиш мумкин бўлади
Шунингдек, Тошкент шаҳри ҳокимининг иқтисодиёт ва тадбиркорлик масалалари бўйича ўринбосари Ҳотамбек Шокиров мамлакатимиз ҳудудида «Яндекс.Такси» агрегаторини ёпиш таклифи билан чиққан. Бу фикрни у Халқ депутатлари Тошкент шаҳар Кенгашининг 58-сессиясидаги нутқида айтган, дея хабар беради Repost.uz нашри.
Пойтахт ҳокими ўринбосарининг таъкидлашича, «Яндекс.Такси» серверлари хорижда жойлашган; унинг ўрнига ўзимизда шунга ўхшаш хизматни ташкил этиш пайти келган. Маҳаллий ноқонуний таксичиларнинг фаолиятини легаллаштириб, уларни шундай сервисга жамласак, натижада солиқлардан давлат бюджетига 430 миллиард сўмгача маблағ тушади, деган Ҳотамбек Шокиров.
ЎҚИНГ: Ўзбекистон ҳатто Google, Яндекс, AliExpress ва Netflix’га ҳам солиқ солмоқчи!
