Янги Android-браузер тезкорликда Google Chrome’ни ортда қолдирди
Бугунги кунда «яшил роботчали» смартфон эгаларининг аксарияти ўз мобил қурилмаларида Google Chrome ишлатишади. Лекин бу браузернинг айрим салбий жиҳатлари мавжуд: тизим ресурсларини кўп сарфлайди, аккумуляторнинг қувватининг тезроқ камайишига ҳам олиб келади.
ЎҚИНГ: Энг тезкор Firefox Quantum браузери тақдим этилди – Chrome’дан 30 фоизга тежамкорроқ (+видео)
XDA форумидаги «arnaud42» никли дастурчи ўзи ясаган янги веб-браузерни эълон қилди – у тезкорлик бўйича Google Chrome дастуридан сезиларли даражада яхши. Chromium ҳамда WebKit движоги базасидаги бу браузер Kiwi деб номланади. Мазкур илова анчагина содда ва қулай интерфейсга ҳамда кўплаб керакли функцияларга эга.
Синовларда маълум бўлишича, Kiwi чиндан ҳам ишга тушиш тезлиги, саҳифаларни юклаши ва бошқа бир қатор жиҳатларига кўра «қидирув гиганти»нинг браузеридан олдинда. Бунинг устига, у тизим ресурсларини кам харжлайди; шунинг эвазига Kiwi дастури процессори кучсизроқ ҳамда тезкор хотирасининг ҳажми кичкина бўлган смартфонларда ҳам яхши ишлайди.
ЎҚИНГ: Ҳамёнбоп ва кучсизроқ смартфонлар учун саккизта «енгил» илова
Kiwi веб-браузери яратувчиси уни мунтазам тарзда янгилаб туришга ваъда беряпти. Дастурчининг даъвосича, иловаси барча замонавий функцияларни қўллаб қувватлайдки, уларнинг айримлари ҳатто Google Chrome’да умуман йўқ.
Агар истаса, фойдаланувчи Kiwi’да тўқранг интерфейсни фаоллаштириши мумкин – бу тунда кўз нурини асрашка кўмаклашади. Браузерда рекламаларни блокловчи функция ҳам мавжуд, сёрфинг билан параллел тарзда файлларни юклаш мумкин, яна бошқа бир қатор опциялари бор.
Яна бир жиҳати – янги лойиҳа очиқ бошланғич кодга эга, истаган дастурчи унда троянлар йўқлигини ўзи текшириб кўриши мумкин.
Агарда янги, енгил Kiwi браузерини ишлатиб кўришни хоҳласангиз, Google Play иловалар каталогидан уни мана бу ҳавола орқали ўрнатиб оласиз.
