Apple Watch savdolari 71,6 foizga tushib ketdi
Ferra nashrining analitika bilan shug‘ullanadigan IDC kompaniyasiga tayanib bergan ma’lumotiga ko‘ra, 2016 yil 3 choragida jahon bo‘ylab jami 2,7 mln dona smart-soat sotuvga chiqarilgan. Mazkur ko‘rsatkich o‘tgan yilning shu davriga nisbatan 51,6 foizga kamdir (2015 yilning 3 choragida jami 5,6 mln dona smart-soat sotuvga chiqarilgan edi).
Ushbu segmentda haligacha AQShning Apple kompaniyasi yaqqol yetakchilik qilib kelmoqda. Shunga qaramasdan uning bu yilgi savdo ko‘rsatkichlari 71,6 foizga tushib ketgan (savdolar 3,9 milliondan 1,1 milliongacha kamaygan). Tahlilchilarning fikricha, so‘nggi chorakda taqdim etilgan yangi qurilmalar hisobiga 2016 yilning 4 choragida smart-soatlarning sotuvlari o‘sishi mumkin.
Smart-soatlar ishlab chiqarish va sotish bo‘yicha Garmin, Samsung, Lenovo va Pebble ro‘yxatning yuqori pog‘onalaridan joy olgan. Eng qizig‘i, Garmin kompaniyasi keskin o‘sish ko‘rsatkichlarini qayd qilib, Janubiy Koreyaning Samsung firmasidan o‘tib ketishga muvaffaq bo‘lgan.
