Apple yana jahondagi eng peshqadam smartfton ishlab chiqaruvchi bo‘ldi
Gartner tadqiqot kompaniyasining o‘tayotgan haftada olib borilgan navbatdagi o‘rganishlari natijasida ayni paytda dunyoda ishlab chiqarilayotgan smartfonlarning 17.9 %i Apple kompaniyasi hissasiga to‘g‘ri kelishi ma’lum bo‘ldi. Bungacha smartfon bozrida peshqadam bo‘lgan Samsung’ning mobil aloqa vositalari bozoridagi bu galgi ulushi 17.8 %ni tashkil qilgan. 2016 yilning 4-moliyaviy choragida Apple 77 million dona iPhone sotgan bo‘lsa, Samsung 76.8 million dona smartfon sotishga muvaffaq bo‘lgan.
Smartfon savdosida uloqni so‘nggi 8 chorakdan buyon Koreya Respublikasining Samsung kompaniyasiga boy berayotgan Apple uchun bu navbatdagi muvaffaqiyat davri deyish mumkin.
“So‘nggi marotaba Apple 2014 yilning 4-moliyaviy choragida “aqlli telefon”lar bozorida peshqadamlik qilgan. O‘shanda yirik ekranli iPhone 6 va 6 Plus gadjetlari unga omad keltirgan edi”, deydi tadqiqot kompaniyasi vakili Anshul Gupta.
Apple kompaniyasining bu muvaffaqiyati uning so‘nggi iPhone 7 va iPhone 7 Plus ayfon modellari savdosi bilan bog‘lanmoqda. Shuningdek, o‘tayotgan chorakda Samsung smartfonlariga bo‘lgan ehtiyoj Shimoliy Amerika va G‘arbiy Yevropa mamlakatlarida keskin tushib ketgan.
Samsung kompaniyasining smartfon savdosi 2016 yilning 3-choragidan boshlab pasaya boshlagan. Samsung Galaxy Note 7 gadjetining yonib ketishi bilan bog‘liq holatlar tufayli kompaniya omadsizlikka yuz tutgan.