Galaxy M14 byudjet smartfoni Galaxy S23 kamera dizaynida taqdim qildi
Samsung kompaniyasi bir necha kun avval o'zining byudjet sinf smartfonlari qatoriga yangi, Galaxy M14 modelini qo'shdi. U Galaxy A14 ga o'xshash ko'rinish va texnik xususiyatlarga ega.
Galaxy M14 smartfoni 6.6 dyuymli Full HD+ rezolyutsiyasidagi PLS LCD ekranga ega va u 90 gerts yangilanish tezligini qo'llab-quvvatlaydi. Ekran Samsung'ning Infinity-V ramkasi bilan o'ralgan va V tirqishda 13 MP selfi kamera joylashgan.
Orqa tomondagi uchlik kamera joylashuvi bir qarashda Galaxy S23 smartfonlarini eslatib yuboradi. Ularning asosiysi f/1.8 diafragmali 50 MP sensor bo'lib, u 1080p formatda soniyasiga 30 kadr tezlikda video tasvirga olish imkonini beradi. Qolgan modullarning biri 2 MP makro bo'lsa, yana biri 2MP portret sensoridir.
Kapot ostida qurilma Exynos 1330 chipsetida 4 GB operativ va 64/128 GB doimiy xotira bilan Android 13 ga asoslangan One UI 5 versiyasida ishlaydi. Albatta, xotira yetmaganda uni microSD karta bilan kengaytirish imkoni mavjud. Smartfonning o'ziga xos xususiyati uning batareyasida – 6000 mA/soat batareyani hatto flagmanlarda ham topa olmaysiz. Biroq, quvvat ko'p bo'lgani bilan uni quvvatlash tez bo'lmaydi: USB 2.0 Type-C porti orqali smartfonni 15 Vt tezlikda zaryadlash mumkin.
Qo'shimchasiga smartfon salkam 6 gerts 5G ni qo'llab-quvvatlaydi. Shuningdek, yon tomonida barmoq izini aniqlash skaneri bilan birga simli naushnik uyasiga ham ega.
Samsung Galaxy M14 smartfoni to'q ko'k, och havorang va kulrang ranglarda Ukrainada taklif qilinadi. Narxlar quyidagicha:
- Galaxy M14 (4/64 GB) – 8299 ukrain grivnasi yoxud 225 dollar atrofida;
- Galaxy M14 (4/128 GB) – 8999 ukrain grivnasi yoxud 245 dollar atrofida.
Samsung tez kunda o'zining ushbu smartfonini boshqa davlatlarda ham taqdim qilishi kutilmoqda.
