IMEI-kodni ro‘yxatga olish joriy etilgani kimlarga yaxshi bo‘ldi? (+video)
Yurtimizda mobil qurilmalarining (planshet, smartfon va hokazo) IMEI-kodni ro‘yxatdan o‘tkazish masalasi hamon dolzarbligicha qolmoqda. Biz shu masala yuzasidan Axborot texnologiyalari va kommunikatsiyalarini rivojlantirish vazirligi bayonotini chiqargan edik.
O‘QING: Nihoyat, smartfonlar IMEI-kodini ro‘yxatdan o‘tkazish tartibida o‘zgarish bo‘ldi!
Xabar.uz nashri bu borada «Sifat Biznes Savdo» MChJ vakili Timur Gafurovning fikrini e’lon qilgan va uni quyida keltirmoqdamiz:
– O‘zgarishlar hammadan ko‘ra bizga ko‘proq ta’sir qildi. Bugungi kunda biz o‘z mahsulotlarimiz, telefonlarimiz savdosi bilan to‘laqonli shug‘ullana boshladik. Tegishli qonun chiqqunga qadar smartfonlar bozori tartibga solinmagandi. Biz shunchaki raqobat qilolmasdik. Shunga ko‘ra bozorni ham raqobat maydoni deb bo‘lmasdi. Hozir esa ishonch bilan ayta olamizki, adolat qaror topdi, rasmiy importchilar sifatida davlat byudjetiga katta bojlar to‘layapmiz.
Ro‘yxatga olish jarayonlariga kelsak, hammasi maromida kechyapti. Ariza topshirgandan so‘ng UZIMEI xodimlari 3 kun ichida arizalarimizni ko‘rib chiqib, ro‘yxatga olishyapti.
Bugungi kunda, albatta, umumiy vaziyat yaxshilandi. Biroq, afsuski, ayrim muammolar hali ham mavjud. Ya’ni, mijoz telefonni bozordan sotib olayotganda uning IMEI-kodi bir oydan so‘ng ro‘yxatga olinishini aytishadi. Shunda mijoz «Nima uchun bir oydan so‘ng?» degan haqli savolni berishi kerak. Tabiiyki, bu noqonuniy olib kirilgan telefon bo‘lib chiqadi. Biz esa mijozlarimizga telefonlarimizni qonuniy olib kirganimizga kafolat beramiz. Uyali aloqa vositasi savdoga chiqishidan oldin rasmiy diler sifatida zarur tegishli jarayonlardan o‘tamiz. Mahsulotlarimizni sertifikatlashtiramiz. Ularining qonuniyligi, ularda hech qanday muammo yuzaga kelmasligiga mijozlarimizga kafolat beramiz. Bordi-yu, birorta muammo kelib chiqsa, mijozlar bizga murojaat qilishi mumkin.
Sifat kafolati nima degani? Bu shuni anglatadiki, mijoz bizdan telefon sotib olgach bir oy yoki bir yildan keyin ham muammo yuzaga kelsa, bizga uchrashib, bizdan kafolat talab qilishga haqli.
Biz bir kunlik kompaniya emasmiz. 20 yildan beri bozorda faoliyat yuritib kelyapmiz. Biz bilan hisoblashishadi, bizni hurmat qilishadi. O‘zimizni ishonchli hamkor, insofli importchi sifatida allaqachon ko‘rsata oldik.
Ko‘pgina odamlar bexabarliklari tufayli telefonni xarid qilgach, IMEI-kodni tizimda o‘zlari ro‘yxatdan o‘tkazishi kerak, deb o‘ylashadi. Lekin bu noto‘g‘ri. Chunki telefonni olib kirgan importchi bo‘ladimi, kompaniya bo‘ladimi – bu ishni ular amalga oshirishi zarur.
Ma’lumot uchun:
IMEI (International Mobile Equipment Identity – Xalqaro mobil qurilma identifikatsiyasi) mobil tarmoqdagi qurilmani identifikatsiyalash uchun unikal raqam hisoblanadi.
