iOS 11’da uzoq kutilgan funksiyalardan biri paydo bo‘ldi (+video)
Nihoyat, iOS 11 operatsion tizimiga
ko‘pchilik mashina haydovchilar uzoq kutgan «Harakatlanish paytida bezovta qilmaslik»
funksiyasi qo‘shildi. Bunda siz rulda paytingiz tizim nafaqat barcha kiruvchi
qo‘ng‘iroqlar, xabarlar va bildirishnomalarni cheklaydi, balki istagingizga ko‘ra
abonentlarga avtomatik javob ham yubora oladi. Bu to‘g‘rida AppleInsider nashri xabar bergan.
Keling, uning qanday ishlashingizni ko‘rib chiqamiz.
Avvalo, yangi «Bezovta qilmaslik» rejimini o‘zingiz faollashtirishingiz ham,
avtomatik yoqiladigan qilishingiz ham mumkin. Masalan, iPhone’ingiz
avtomobilingizga Bluetooth orqali ulanganida bu rejim ishga tushib ketadigan
qilib qo‘ysangiz bo‘ladi. Agarda siz yo‘lovchi o‘rindig‘ida o‘tirgan bo‘lsangiz, ayni
damda haydovchi emasligingizni iOS tizimiga bildirib qo‘yishingiz mumkin.
«Harakatlanish paytida bezovta qilmaslik» funksiyasi faollashgan payti,
nima bo‘lishidan qat’i nazar, iPhone ekrani qop-qora holida turaveradi. Uyingizdan
qo‘ng‘iroq bo‘ladimi yo biror messenjerdan xabar keladimi – farqi yo‘q, smartfoningiz
sizga buni bildirmaydi – rulni boshqarishdan chalg‘itmaydi. Agarda kimdir matnli xabar
yuborsa, ayni paytda rulda ekaningiz haqida avtomatik javob qaytarishni sozlab
qo‘yishingiz mumkin. Juda favqulodda holatlar uchun esa, bitta xabarni ketma-ket
ikki marta jo‘natish orqali «Bezovta qilmaslik» rejimini «buzish» ham ko‘zda
tutilgan (buni o‘chirish imkoni ham bor).
Shunisi ham borki, agarda siz vatomobildagi Bluetooth yoki hands-free aksessuari
yordamida gaplashadigan bo‘lsangiz, tizim kiruvchi qo‘ng‘iroqlarni cheklamaydi. Shuningdek,
«Bezovta qilmaslik» rejimini muhim holatlarda uzib qo‘yishingiz ham mumkin. Bulardan
tashqari, o‘smir yoshdagilarning smartfonida yangi rejimni uzib qo‘yishning o‘zini
cheklash imkoni ham bor.
«Harakatlanish paytida bezovta qilmaslik» funksiyasidan iOS 11 tizimining
dasturchilarga mo‘ljallangan ikkinchi beta-versiyasida, shuningdek, ommaviy taqdim
etilgan beta-versiyada foydalanish mumkin.
