“Migrant” mobil ilovasi 10 ming martadan ortiq yuklab olindi
“Migrant” mobil ilovasi Rossiyada mehnat qilayotgan yoki ishlashni rejalashtirayotgan mehnat muhojirlariga rus, o‘zbek va tojik tillarida xizmat ko‘rsatadi. Hozirgi paytda dasturdan foydalanuvchilar uchun Rossiyaga kirish taqiqi bor-yo‘qligini aniqlash hamda patent va ishga ruxsatnomaning haqiqiy ekanligini tekshirish imkoniyati bor. Shu kungacha dasturdan foydalanayotganlar soni 10 mingdan oshib ketdi.
Dastur mehnat muhojirlari uchun yagona va sodda interfeys orqali ijro hokimiyatiga qarashli turli organlar ko‘rsatayotgan xizmatlardan foydalanishga imkon beradi.
“Hozirgi kunda dasturning atigi ikki funksiyasi mavjud. Lekin bu dastlabki versiya va ayni paytda keyingi versiya ustida qizgin ish ketmoqda”,- deydi “LeksMobayl” yuridik firmasi rahbari Botirjon Shermatov. Uning aytishicha, dasturga foydalanuvchilar ehtiyoj va talablaridan kelib chiqqan holda ko‘pgina foydali va qiziqarli qo‘shimchalar kiritish rejalashtirilgan. Jumladan,
- federal soliq xizmati saytiga kirmasdan patent uchun to‘lov kvitansiyasini shakllashtirish;
- to‘lov o‘tkazish;
- shaxsiy INNni aniqlash va boshqa ishlarni amalga oshirish;
- dasturga “eslatish” funksiyasi kiritilgach, u muhojirni qachon patent uchun to‘lov o‘tkazishi lozimligi, registratsiya muddati qachon tugashi va mamlakatni tark etishi zarurligi haqida o‘z vaqtida ogohlantirib boradi.
