Sport telekanali Olimpiada o‘yinlarini to‘g‘ridan-to‘g‘ri translyasiya qiladi
Telekanalda Riodagi Olimpiya shaharchasi va olimpiachilar hayoti batafsil yoritiladi. Bu haqda Uz24.Uz xabar bermoqda.
O‘zbekiston milliy teleradiokompaniyasi shu yilning 5 avgustidan 21 avgustigacha Braziliyaning Rio-de-Janeyro shahrida bo‘lib o‘tadigan XXXI yozgi Olimpiada o‘yinlarini namoyish etish huquqini qo‘lga kiritdi.
Sport telekanali Olimpiada o‘yinlarining ochilish va yopilish marosimi, sportchilarning musobaqalari, xususan, o‘zbek olimpiachilarining chiqishlarini to‘g‘ridan-to‘g‘ri ko‘rsatadi.
Olimpiya terma jamoasidan iborat O‘zbekiston delegatsiyasi tarkibida Braziliyaga Sport telekanalining muxbiri ham yuborilgan, u Olimpiya shaharchasi hayotini yoritadi, olimpiyachilarimizning yashash sharoiti va kayfiyati haqida so‘zlab, sportchilardan intervyular oladi.
Eslatib o‘tamiz, 1 avgust kuni O‘zbekiston Olimpiya terma jamoasi Rioga jo‘nab ketishdi. 3 avgust kuni Olimpiya qishlog‘ida O‘zbekiston bayrog‘i ko‘tarildi. O‘zbekistonlik sportchilar 120 dan ortiq Olimpiada litsenziyalarini qo‘lga kiritishgan, ulardan 70 ta yo‘llanma olimpiyachilarga, yana 52 tasi paralimpiyachilarga tegishli.