Xiaomi biryo‘la ikkita – Mi 7 hamda Mi 8 flagmanlarini tayyorlabdi, ularning old panelini «jonli» tomosha qilamiz!
«Xitoycha Apple»ning navbatdagi flagman smartfoni sanoq bo‘yicha Mi 7 deb nomlanishi kutilayotgan edi. Lekin keyingi kunlardagi xabarlarga ko‘ra, Xiaomi bu ilg‘or gadjetini o‘zining sakkiz yilligiga bag‘ishlab Mi 8 deb atashga qaror qilgan.
O‘QING: Kutilmagan xabar: Xiaomi’ning yangi flagmani Mi 7 emas, Mi 8 bo‘lar ekan!
Shuningdek, undan so‘ng ham bu borada bir-birini inkor etuvchi ma’lumotlar tarqaldi. Nihoyat, bir necha soat avval – 22 may kuni insayderlar bergan ma’lumot ular orasidan eng ishonchlisi ekani ma’lum bo‘ldi. Unga ko‘ra, Xiaomi birato‘la ikkita – Mi 7 va Mi 8 rusumli flagmanlarini taqdim etadi!
Mana, quyidagi suratda chapda – Xiaomi Mi 8, o‘ngda esa – Xiaomi Mi 7 smartfonining old panellari aks etgan.
Ta’kidlash kerakki, Xiaomi Mi 8 haqida ma’lumotlar chiqishi bilan kompaniya Mi 7 modelidan voz kechgani ham aytilib kelayotgandi. Biroq xitoylik korporatsiya o‘zining sakkiz yilligiga atalgan flagmanining nisbatan soddalashtirilgan varianti sifatida bu devaysni ham taqdim etishi ehtimoli yuqori.
Xiaomi shu va boshqa gadjetlarining taqdimotini bir haftadan so‘ng – 31 may kuni Shenchjen shahrida tashkillashtiriladigan matbuot anjumanida o‘tkazadi. Ungacha yana bu borada yangi ma’lumotlar chiqishi tayin, ular haqida birinchilar qatorida bilib olish uchun bizdan uzoqlashmang!
