Махфий кўрсатмада нега АҚШ полициячиларига янги iPhone’ларга қарамаслик буюрилган?

Бирор жиноят бўйича гумондор қўлга олинганида, унинг смартфони ҳам ашёвий далил бўлиб хизмат қилиши, жиноятга алоқадор тафсилотларни аниқлаштиришда ёрдам бериши мумкин. Аммо кейинги моделлардаги – 3D-сканерга эга iPhone’лар бу борада алоҳида ёндашувни талаб этар экан.

ЎҚИНГ: Жонсиз тана ёрдамида смартфонни блокировкадан чиқариш мумкинми?

Ахборот хавфсизлиги соҳасида фаолият олиб борувчи Elcomsoft компанияси АҚШ полициячиларига мўлжаллаб тайёрлаган махфий слайд инсайдерлар қўлига тушиб қолган. Унда тавсия этилишича, полициячилар гумондорнинг iPhone’и экранига иложи борича қарамасликлари керак. Зеро, кейинги икки йилда тақдим этилган айфонлар эгасининг қиёфасини таниш орқали тизимни қулфдан чиқариш технологиясига эга. Агарда полициячи смартфонга қараса, смартфон буни 3D-сканер орқали тизимни очишга уриниш, деб баҳолайди. Агарда бешта шунақа самарасиз уриниш амалга оширилса, ушбу сканер ҳам блокланади ва уни очиш учун махсус код керак бўлади.

Шунингдек, «Home» тугмачасига бармоқ босиш ҳам тизим қулфини очишга бўлган уриниш сифатида қабул қилинади. Натижада, бешта муваффақиятсиз уринишдан сўнг бу сканер ҳам блокланиб қолиши эҳтимоли бор. Натижада смартфонни фақат унинг эгаси биладиган махсус код орқалигина блокдан чиқариш мумкин бўлади.

Шу боис ҳам ҳуқуқ-тартибот идоралари вакиллари смартфонларни блокдан чиқаришга уриниш, дея баҳоланувчи ҳаракатларни амалга оширмасликлари, жумладан, янги русумлардаги айфонларнинг олд томонига қарамасликлари тавсия этилган.

ЎҚИНГ: iPhone ҳимоясини бузиш йўли топилди! Ундан қандай ҳимояланишни ўрганиб қўйинг! (+«жонли» видео)