5G-пойга: Xiaomi ҳали тақдим этилмаган Mi Mix 3 смартфонида аллақачон 5G тармоғини ишлатиб кўрсатди! («жонли» сурат)
Куни кечагина Xiaomi президенти Бин Лин (Bin Lin) октябрда расман намойиш этиладиган Mi Mix 3 моделининг «жонли» расмини эълон қилгани ҳақида хабар бергандик. Ушбу флагман смартфонсозликда кейинги бир йилда эришилган деярли барча инновация ютуқларини ўзида жамлаган.
ЎҚИНГ: Ниҳоят, Xiaomi президенти Mi Mix 3’ни «жонли» кўрсатди ва тақдимот вақтини айтди!
Weibo ижтимоий тармоғи орқали Бин Лин кеча – 3 сентябрда эълон қилган навбатдаги суратда эса Xiaomi Mi Mix 3 ишлаётган ҳолатида акс эттирилган. Бугина эмас – унинг экрани юқорисидаги ҳолат қаторида смартфоннинг бешинчи авлод уяли алоқа тармоғида ишлаётганлигини билдирувчи «5G» ёзуви турибди!
Xiaomi президенти ушбу сурат билан эълон қилган қайдида ёзишича, компания аллақачон бешинчи авлод уяли алоқа тармоғи синовларини муваффақиятли ўтказган.
ЎҚИНГ: Xiaomi vs Lenovo: Snapdragon 855 чипли илк 5G-смартфон учун жанг
Шунингдек, юқоридаги фотосуратда орқа фонда акс этган ёзувлардан англашиладики, Xiaomi компанияси 5G тармоғининг оммабоп – N78 (20 МГц), шунингдек N257 (100 ГГц) частоталарини синаб кўрмоқда.
Булардан ташқари, «хитойча Apple» ўзининг 5G-смартфонини 2019 йили тақдим этишини тасдиқлаган. Агарда Mi Mix 3 моделининг жорий йил октябрда намойиш этилишини ҳисобга олсак, у ҳали тўлақонли 5G-смартфон бўлмайди. Эҳтимол, бу технология шу моделнинг ўзига 2019 йилдаги дастурий таъминот янгиланишлари билан жорий этилар.
Ҳозирча эса учинчи авлод Mi Mix флагманига қўшимча 5G-модем улаган ҳолда бешинчи авлод уяли алоқа тармоғини тестдан ўтказган бўлишлари мумкин. Аввалроқ Oppo компанияси худди шундай йўл тутган – баҳорда тақдим этилиб, ҳозирда аллақачон харидорлар қўлида ишлатилаётган Oppo R15 модели намунасига Qualcomm X50 модемини улаб, 5G тармоғини ишлатиб кўрсатган эди.
Эслатиб ўтамиз, Mi Mix 3 флагманининг тақдимоти шу йилнинг октябрига мўлжалланган; компаниянинг бошқа кўплаб моделлардаги смартфонларини эса ўзимизда ҳам бир йиллик кафолати билан онлайн буюртма асосида харид қилиш имкони мавжуд.
