Барча Galaxy S20’лардаги ушбу янги функция Apple’нинг энг зўр флагманида ҳам йўқ!
XDA Developers ресурсининг бош муҳаррири Макс Вайнбах (Max Weinbach) жанубий кореялик гигантнинг Galaxy S20 смартфонлар оиласи ҳақида янги маълумотлар беришда давом этмоқда. Twitter тармоғида у эълон қилган навбатдаги хабар мазкур флагманларнинг ажойиб янги функцияси хусусидадир.
ЎҚИНГ: Galaxy S20 қачондан сотувга чиқиши расман маълум бўлди
Маълум бўлишича, флагманлар оиласи бир вақтнинг ўзида бош камеранинг ҳар учала (асосий, кенг бурчакли ва телеобъективли) модуллари ёрдамида алоҳида-алоҳида расмга туширишга ва видеога олишга қодир. Ушбу хусусият стандарт Galaxy S20 моделида ҳам, янада илғор Galaxy S20 Plus ҳамда Galaxy S20 Ultra флагманларида ҳам бор.
Манбага кўра, камеранинг барча сенсорларидан бир вақтнинг ўзида фойдаланиш функцияси Quick Take дея ном олган. Унда фото ёки видео суратга олгач, фойдаланувчи галереяни очиб, қайси камерада олингани яхши чиққан бўлса, ўшани танлаб сақлаши ва қолганларини ўчириб юбориши мумкин.
Таъкидлаб ўтиш керакки, 2018 йили тақдим этилган LG V40 смартфонида ҳам шундай функция мавжуд бўлиб, у Triple Shot деб аталган. Асосий рақибнинг iPhone 11 Pro ҳамда iPhone 11 Pro Max флагманларига келсак, улар учун яқинда тақдим этилган DoubleTake иловаси бир вақтнинг ўзида иккита камерада видео ёзиб олиш имконини беради.
ЎҚИНГ: Huawei энди Samsung’га қақшатқич зарба бериш йўлини топди!
