БОШЛАНДИ: Galaxy S20’ларнинг энг мақталган жиҳатида муаммолар чиқяпти!
Samsung яқинда Galaxy S20, Galaxy S20 Plus ҳамда Galaxy S20 Ultra флагманларини намойиш қилган бўлиб, айрим мамлакатларда улар сотувга ҳам чиқиб улгурган. Шунингдек, компаниянинг ўзи айрим нуфузли нашрларга тавсиф учун бу моделлардан тақдим этган.
ЎҚИНГ: Galaxy S20, S20+ ва S20 Ultra’ларнинг барча фарқларини биттада кўриб чиқамиз
Жанубий кореялик техногигантнинг ушбу смартфонлари, хусусан, компания асосий урғуни қаратган жиҳат – уларнинг камералари борасида билдирилган фикрлар эса турли-туман бўлди. Улар Samsung мақтаганидек яхши суратга олади, аммо вақти-вақти билан муаммолар ҳам кузатилади.
Жумладан, Galaxy S20 флагманларини илк бор синаб кўрган журналистлар ва фойдаланувчилар уларнинг камераларида иккита муаммони кўп таъкидлашган. Булардан биринчиси – расмга тушираётганда фокусировка учун кўп вақт сарфланади, баъзида ҳатто камера фокус ола олмай қолади. Иккинчиси эса – бу смартфонда одамларни суратга туширганда, уларнинг юзларини ўта сип-силлиқ қилиб чиқаради. Ҳаттоки камераси нақ 108 мегапикселлик асосий модулга ва юқори даражадаги деталлаштиришга эга бўлган Galaxy S20 Ultra ҳам юздаги майда деталларни пайқамасдан, терини бир текис қилиб чиқаради.
Фойдаланувчиларнинг шикоятларидан ташқари, бу муаммоларга The Verge, PC Mag ҳамда Input каби нашрлар ҳам эътибор қаратишган. Samsung компанияси бунга тезкорлик билан муносабат билдириб, Galaxy S20 туркумидаги смартфонлар камерасини яхшилашга ваъда берган. Бироқ муаммони айнан қай йўсинда ҳал этишига аниқлик киритмаган; ҳар ҳолда, буни дастурий таъминот янгиланиши доирасида амалга оширса керак.
