Galaxy Note 8’нинг тақдимот вақтини Samsung расман маълум қилди
Узоқ кутилган Samsung Galaxy Note 8 смартфони, ниҳоят, кейинги ойда тақдим этиладиган бўлди. Бу ҳақда Жанубий Кореянинг The Investor медиаресурси хабар берган.
Унда айтилишича, Samsung қурилмасининг тақдимоти 2017 йилнинг август ойида бўлиб ўтади. Хабарда ёзилишича, смартфон кенг оммага Нью-Йорк шаҳрида тақдим этилади. Бу ҳақда нашр таҳририятига Samsung компанияси раҳбариятининг расмий вакили маълум қилган.
Кореядаги яна бир манба – The Bell эса, Galaxy Note 8 тақдимотининг куни ҳам аниқ – у 23 августда бўлиб ўтади, деб ёзган. Лекин бунчалик аниқ санани тасдиқловчи расмий маълумот ҳозирча йўқ.
Аввалроқ, бу смартфон сентябрнинг иккинчи ярмида намойиш этилиши мумкинлиги ҳақида ҳам хабарлар чиққанди. Яна, Galaxy Note 8 августда тақдим этилади, савдога эса бир ой ўтгач чиқарилади, деган гаплар ҳам бўлган. Энди маълум бўлишича, янги девайс билан кузга қолмасдан танишар эканмиз.
Samsung Galaxy Note 8’нинг бунақа эрта чиқарилишини таҳлилчилар икки омил билан боғлашаётир. Биринчидан, аввал ҳам шундай ҳолат кузатилган: Note 7 тақдимоти 7 августда ўтказилиб, у 19 августда сотувга чиқарилганди. Иккинчидан, куз арафасида янги смартфонлар бозорида рақобат кучайиши турган гап. Чунки «юбилей» модели – iPhone 8 билан Apple смартфонлар туркумини йирик янгиланиш кутаётир. Айни шу пайтда Google ҳам Pixel 2 модели билан «рақобат оловига мой пуркаши» вазиятни янада қизитади.
Эслатиб ўтамиз, Galaxy Note 8’нинг суратлари аввалроқ тарқаб кетган, DBS Designing студияси бўлажак илғор гаджетнинг рендерларини тайёрлаб, жамоатчилик эътиборига ҳавола қилган эди. Қурилманинг янги авлод камера инновациясига эга бўлиши ҳақида ҳам хабар берганмиз, унинг синовдан ўтказилаётганини маълум қилганмиз ва унинг видеосини ҳам тақдим этганмиз.
