Samsung бехосдан Galaxy A8 ва A8+ сирларини расмий сайтида «сотиб қўйди»
Жанубий кореялик техногигантнинг Galaxy A туркумидаги янги тақдим этилажак смартфонлари – «салкам флагман» Galaxy A8 ҳамда A8+ моделлари тегишлича Galaxy A5 ва A7 қурилмаларининг 2018 йилги «давомчилари» бўлишидан хабарингиз бор. Шу пайтгача мазкур девайсларнинг норасмий суратлари ва ҳатто видеоси ҳам интернетда тарқалган эди.
ЎҚИНГ: Тўлиқ экранли Galaxy A8+’нинг илк видеоролигини томоша қилинг!
Энди эса, Samsung’нинг ўзи уларнинг хусусиятларини тасодифан фош этиб қўйди, деб ёзади Android Police.
Гап шундаки, компаниянинг сайтига аллақачон янги авлод смартфонларидан фойдаланиш қўлланмаси юклаб қўйилган, уни ўзингиз ҳам мана бу ҳавола орқали кўчириб олиб, кўриб чиқишингиз мумкин. PDF форматидаги мазкур йўриқнома туфайли энди Samsung’нинг 2018 йилги Galaxy A8 ҳамда A8+ смартфонларининг баъзи хусусиятлари ҳақида расмий маълумотга эгамиз.
Аввал ҳам айтиб келинаётганидек, A8 ва A8 Plus қурилмаларининг олд камераси қўш объективга эга бўлади. Уларнинг неча мегапикселли экани хусусида мазкур ҳужжатда маълумот берилмаган, аммо аввал чиққан хабарларга кўра, у 16 ва 8 мегапикселли датчиклардан иборат.
ЎҚИНГ: Кутилмаган Galaxy A8 (2018): унга ҳатто Galaxy S8 ва Note 8 эгалари ҳам ҳавас қилишлари тайин!
Суратига қараганда, ҳар иккала гаджетнинг экранлари томонлари ўзаро 18:9 нисбатда бўлиб, икки чеккасида нозиккина роми мавжуд. Смартфоннинг дактилоскопик сканери орқа панелда – камера остида бўлиши айтилмоқда.
Фойдаланувчи қўлланмасида кўрсатилишича, бу икки смартфон Android 7.1.1 Nougat операцион тизим бошқаруви остида ишлайди. Улар Samsung Pay ҳамда Bixby овозли ёрдамчисини қўллаб-қувватлайди. Шунингдек, қурилмаларда USB-C порти билан бирга қулоқчинлар учун стандарт 3,5 миллиметрлик тирқиш ҳам қолдирилганлиги эътиборга лойиқ.
Бу борадаги янгиликлардан биринчилар қаторида бохабар бўлиб бориш учун биздан узоқлашманг.
